30 Jun 2013

Elija au leh rawh

Elija au leh rawh

Phuahtu: Upa K. Thangsiama
Satu: Mapuii & Freddy

Jerusalem pindan a lungngai ten,
Vawi tamtak Lal Isua an phatsan hnu in;
Harhna ropui a lo thlen chuan,
Isua hming sawi lovin an awm thei lo.

Kan ram a ro Elija au leh rawh,
Kan ramin a mamawh em e harhna;
Van tukverh te hawng leh la,
Lalpa harhna ropui han thlen tir leh ang che.

Zoram in Isua a rin tirh lai khan,
Thlarau ah an tuihal nuntam an neih nan;
Kawlvalenchham panin an kal,
An haw lam chu pawl hnih zet an lo ni e.

Kan ram kan hnam min chawikang tu thlarau,
Vawi tam tak kan ti vui che min ngaidam rawh;
Kan au che thisen a lei ten,
Thlipui, ruahpui harhna rawn thlen leh rawh.


Zion Pathian khawpui

Zion Pathian khawpui

Phuahtu: Dr. Ramdinthara Sailo
Satu: BCM Central Church Choir, Electric veng Pastor Bial Zaipawl, Dorki Group (Chaltlang Kohhran Hmeichhia)

Zion khawpui hlun Pathian khawpui chu,
I sakhming a thangmawi hluan e;
Chatuanin i nghing lawng sualral hrang mahse,
I dinna Lungpui Krista a ni si.

Zion Pathian khawpui chu,
I mite himna kulhpui nghet chu;
An puar an tlai thin riltam tuihalte,
I chhungah Lalpa a chen avangin.

I mawina itsik vangin hmelma ten,
Tihchhiat tumin beiche mahse;
Kan Pathian khawpui mawi i nghing dawn silo,
I vengtu Lalpa a muhil ngai lo.

Famkim kan awmlo he lei kohhran te,
Mahse van kohhran ho nen khian;
Tunah pawh kan inzawm chatuan ram thleng in,
Lalpa kohhran ho i kal zel ang aw.


Ka tawngtaina

Ka tawngtaina

Phuahtu: F. Zothanpuii
Satu: C. Lalhmingmawii

Lalpa hei ka tawngtaina
Remna thlen tu atan min hmangla
Inhuatna awmna hmun ah te hmangaihna
Thlen turin min pui la

Ka thinlung chhungril ngaihtuahna hi
Nangin min ven sak fo ang che
Malsawmna midang te tana ka nih theih nan
Lalpa min pui rawh

Lalpa hnemtu nih ka duh e
Hriatthiam nih aiin hrethiamtu
Hmangaih nih aiin hmangaihtu
Ka nih theih nan i hnen ka rawn pan

Kan pek hian pek in kan awm thin
Kan ngaihdam hian ngaihdam in kan awm a
Thihna ah hian a ni a awm
Chatuan nunna a luhna tur chu.


El Dorado

El Dorado

Phuahtu: BD-a
Satu: C. Lalhmingmawii

Aw ka nun khawhar chau tak hian,
Hmangaihtu a ngai thin a;
Aw ka nunna hian Lalpa a ngai a ni.

I tello chuan nun a kim lo,
Ka zinkawng khawhar ah hian;
An sawi nin loh ramnuam El Dorado,
An ngai thin ang hian,
Lalpa ka ngai em che.

Aw ka nun chau rethei tak hian,
Hnemtu a ngai a ni;
Aw ka hringnun hian Lalpa a ngai a ni.

Hmangaihtu tawnglo nun khawhar,
Kei misual leh rethei tan hian;
Aw lo eng ang che ka nun khawhar ah hian.

Aigupta sabel

Aigupta sabel

Phuahtu: Madinmawia
Satu: C. Lalhmingmawii

Hruai chhuah ka ni, min hmangaih vangin,
Ka saltanna hmun atang chuan;
Kraws lamtluang zawhin ka pen chhuak ta,
Saruak tuihalin ka chau leh thin.

Aw, min hruaiin min awmpui ang che,
Chhun leh zanah min veng la;
Meialh leh chhumdingin min hruai ang che,
Aigupta sabel ngai lovin min hruai ang che.

Lungngaihna leh thlemna tinreng te'n,
Min tibuaiin min au thin mahse;
Famkimna Kanan ram ka thlirin,
Hnunglam hawikir thei ka ni tawh lo.

Hlauhawmna leh indo thuthang te,
Thlipui hrangin min nuai vel mahse;
Hawnna remchang hmu pawh ni ila,
Ka tan kawnghlui zawh a har lua e.


Tui hna thar

Tui hna thar

Satu: Felina Lalremruati

Zion tlang kan panna kawng ah,
Thlaler ramro kan thleng thin a;
Ka hmabak lam chu ka thlir a,
Ka ngaihtuahna a ti buai.

Mahse Zion kan thlen hun chuan,
Tahna ruam a ka lungngaihna zawng hi;
Hlimna lawmna an chang dawn si,
Tui hna thar chu kan in tawh ang.

Tuipuisen ata min hruai chhuak,
Duhaisam zawng a kim thei lo;
Ka chhuahsan lam chu ka thlir a,
Min lo hip khawvel thil nen.

Fakna hla sa a hlimni te,
A lo chuai nun a khawhar thin;
chhandam nih ka in ringhlel a,
Hmalam pan a har ka ti.


A angchhung nuamah chuan

A angchhung nuamah chuan

Phuahtu: J. Zaihmingthanga
Satu: Jennifer Vanlallawmawmi

Khawvel thlaler ah hian bo hlauhawm karah pawh,
Ka kawng Krista a ni thutak leh nunna chu;
Setan rallian hrang nghal in min bei thin mahsela,
A nghing lawng lal Krista ka lungpui nghet tak chu.

Ka himna leh ka bikna hmun ralmuang,
A angchhung nuamah chuan min chawlh tir min luh tir;
Chatuan atana thianghlim min tawmpui, 
Muangten ka thla a hruai zel e.

Sual in a chim phak loh sualin a khawih theih loh,
Ka rauthla ti nungin a man a thukru a;
A nun thar min neih tir a hming min puttir a,
Van nunna thianghlim in chhunril a fan chhuak thin.

A changin a hmaah ka sual mi hriattir a,
A changin dinglamah a malsawm min vur thin;
A changin veilamah sawichhiat mi hlawh tir a,
A changin hnunglamah chhelna mi zirtir thin.


Dam chhung nite an rei si lo

Dam chhung nite an rei si lo

Satu: Bethsy Lalrinsangi, Bawngkawn Pastor Bial Zaipawl, Melody for Christ

Tanpui ngaite tanpuiin, hliamte tuam damin,
Lungngaite hnemin midang tana malsawmna;
Tawngtaina hlanin nunna thu puang r'u,
Dam chhung nite an rei si lo.

Thatlai ni chuaiin mual a liam zel si thin,
Luaithli nulin kan lo inthen he ramah;
Leiah hian hlun tur reng an lo awm si lo,
Chatuan rohlu chuai ve ngai lo chu zawng zel zawk ang.

Ka hunliam hnu han dawn changin au mah ila kir an rel lo,
Hringnun tlai ni kawl a liam hnai mek zel e;
Mahse, tunah zawng tuarna kawng chu rawn zawh vein,
Dam chhung nite an rei si lo.

Dawn chiang teh, kan tan hun tha an liam zel e,
Thim a thute an boral mek, hun a tlem, khua a tlai ta;
Aw, ringtu zawngte'n boral mekte chhanchhuak thuai ang,
Dam chhung nite an rei si lo.
--------------------
He hla hi Saptawng a "Only Here for a Little While" tih hla Wayland Holyfield leh  Richard Leigh te phuah Billy Dean a sak lar atanga Mizo tawng a lehlin a ni.


29 Jun 2013

Aw Sialkhawpui (I am dun ang)

Aw Sialkhawpui (I am dun ang)

Phuahtu: Laltanpuia (Sialsuk)
Satu: Siampuii Sailo, H.Vanlalhlana, F.Lalthangmawii, Zoheriliani, Maenga

Aw Sialkhawpui, ka pianna hmun, ka seilenna tlang liai luai,
Turnipui lenkawl eng ruai hnuaiah hian ka hawi vel a;
Zaleng an tam ka cho rual si loh sumtualah,
Chantawk hmel di ka vai, lung reng a awi thei lo.

Sawichiam a awl, hrilh thiam a har, len zawng a leng thlawt e,
Ka lam sul ang lo hawi la, nau ang tah ka bang nang e;
Chhawrthlapui zawng a ral thei chung lehlam sangah,
I zunleng ngaih kei zawng, Parte, a ral thei lo.

Senlai nau ang tah nan chunnu'n nemte'n a chawi lian che,
Kumtluang tui ang dam reng la biak lai chung Pathian zarah;
Chhimlei run dai awmhar mi chun i chan ai chuan,
Dawn tam val leng karah nui rih la biangnote.

Chhawrthlapui leh siar hmingthang chawngmawipui leng hnuaiah,
Zantiang laikhum zal lo ten lam ang hian lo her chhuak la;
Damchhung tawite tawnmang chang tur hi han dawn la,
Kan lenlai, en chim loh Parte, i am dun ang.
------------------
Note: He hla a chunga kan rawn tarlan hi a phuahtu Pu Laltanpuia (Sialsuk) hian kum 1961 a phuah niin, a phuah dan dik tak zawk a ni a, he hla satu thenkhat te sak dan hi dik lo lai a awm nual a ni.


Duhaisam

Duhaisam

Satu: Mimi Renthlei

Lenrual zawngte u intawng ve maw,
Thaleng dawntuai khuavel mawi tu;
Chhingzo awm hian ka ring mawlh lo,
Biahthu hlan ka rel ta nge.

Dawntisei mampui i chamreng asin,
Thinlaiah min vei ve la;
Tawnmangah tal min chhang ve nang che.

Kan run rawn kai la e, lunglawm a kim ngei ang,
Duhai ka sam thin nang tawn leh nan;
Hmangaih biahthu min hlan ve nan,
Ka dil nang e Khuanu.

Di intawm

Di intawm

Phuahtu: Sena Gangte
Satu: C. Vansanga

Nang chauh ti a biahthu min hlan laiin,
A ruk tein val dang i pawm si maw?
Keizawng ka ngaithiam thei lo a ni.

Ka liam ta nge, ka liam mai ta 'nge,
Ka thiam ve lo a ni, di intawm.

Tunah i lo let leh ta ka tawnah,
"Suihlung ka chhir e, min ngaidam rawh" tiin;
Mahse, a sawt tawh si lo lendun.




Lenna tlang dang

Lenna tlang dang

Phuahtu: Vanlalruata Sailo
Satu: Lianthangpuia, Ruati Liankhum

Tuantul vanga ka liam ni khan maw,
Zing zin lamtluang a thui ngei;
Mahte'n ka dawn, lung reng a awi lo,
Sakhmel tawn loh hrui ang a sei tur hi.

Lenna tlang dang ka tuar zo lo,
Mi u, annempui, ka ngai em che;
I zunzam ngai reng renga,
Tlaini len zawng a har lua e.

Awi maw, ka hril thiam lo ka dawn lungruk,
Thinlaia'n i cham, di bawihte;
Ka ngai em che, ka ngai vawng vawng che,
Tlangsel ka phur, aw, i zun ngai hian.

Vangkhaw sul nghak, Mampui, min dawn ve em?
Kar mah hla se kan tuanna tlang;
Thaikawi biahthu hlan dun zel ang aw,
Hlimte'n sakhmel dar ang tawn leh hma zawng.



Lenna tlang dang

Lenna tlang dang

Phuahtu: Lalzauva Hnamte
Satu: H.Lalthakima

Tap hluanin zai ka vawr nang e,
Enchimloh di, nang ngaih hi aw;
A na asin, ka tuar zo lo,
I zun phurh hian ka chau zo ta.

Lenrualte zawng, 
An chhailai di runah an kai;
Kei zawng ar ang ka vai,
Lenna tlang dang a pawi ber mai.

Suihlunglen hi, suihlunglen hi,
Ka hringnun hian a zo lo ve;
Uaia dairial chan mai loh nan,
I rauthla tal rawn tir ta che.

Theih chang ve se, theih chang ve se,
Nang nena khuahmun lendun hi;
Ka nuam a sin sakhmel tawn nan,
Ti hian duhthu ka sam fo thin.

Chung Khuanu zarah damreng la,
Chhingkhuala di chuailopari;
Ka tan bawihte, lo vul reng la,
Sakhmel tawnni a her ngei ang.


27 Jun 2013

Rualtin khumtu YMA

Rualtin khumtu YMA

Phuahtu: V. Thangzama
Satu: Vanlalruati, P.C Vanlalhriati (Tenu-i)

Hmanah pipu zaleng rual, sa leh ral thuam ang a do,
A chhingzo tur zaleng rual awmthei reng hian ka ring lo;
Hranghrui leng zamual an liam, amin tuaithar te an cho,
Rualtin khum zaleng insiam Y.M.A sakhming an ko.

Ka lenrual lungduh te u, phang lo te'n i pen ang u,
Ramriangte hi kan kur pui, hmatiang sawna kan tul pui;
Ram kalsiam tluang zau e, pheikhai then reng a zang e,
Kan luah ngei dawn e, pen r'u, raltiang kai i rel ang u.

An pai lengin an hrilhfak, kan Zotlang tluan a tlawm mak,
Khawvel zawng hian an hai lo, nghilhthei hianin an mawi lo;
Zawmthawt khuatlai a awm lo, lungrual te'n hma an hlen fo,
Khuangruah sur hal a awm lo, turni hrang a pawi lem lo.

Amin sel lo u hmingtha, lo hlan ve u chan ai tha,
Hleite'n dang lo a thang ri, khuatin mawitu a lo ni;
Chanhai, riangvai te puitu, thlafam lusun te hnemtu,
Kristian eng chu an lo chhi, duhaisam chu hei ngei hi.

Lanu leng leh kan valrual, Zorampar chu nangni hi;
In partin vul a mawi zual, in par zu lah a thlum si,
Hnamtin dawnpui ka nuam e, khuai ang lawiin lo leng se,
Dawnin an ma bil lo'ng e, kir zai reng an rel lo'ng e.

Hemi hla hi hetah hian a ngaihthlak thei e: Rualtinkhumtu YMA
I chul tur hi - Zoawi Lelte

I chul tur hi - Zoawi Lelte

Phuahtu: Zirsangzela Hnamte
Thluk siamtu: Joseph Zokunga
Satu: Vanlalruati

Vanhnuai thang hming tha chuang,
Khuavel thang chhuak a'n maw;
I lo pian hringmi hei zawng zinga’n,
Khuanu chawi hminglian tha rualkhumin.

Engtin ngai ang maw,
Zofaleng zawng te'n;
Zoawi Lelte timaia i chul tur hi.

Kan ngaithiam thei nem le,
I zun phur leng zawngte’n,
Ti maia khiangawih hi kan tiam nem,
Mahse, auh kir rual i chang si lo.

I dawn kim lo a ni,
Zofate'n kan chan hi;
I tel lo chuan he kan Zoram hian,
Kalsiam relin ka ring thei lo.

Aw le, dam takin le,
Tiin i rual duhte’n;
Kan thlah nang che khiangawi mual chu liam la,
Fanau chawiin kumtluang dam reng rawh.



26 Jun 2013

Raltiang ram

Raltiang ram

Satu: Hlimen Pastor Bial Zaipawl (2004-2005)

Lalpa, i ram ka thlen hma zawng,
Kei ka hringnun zaleng zingah;
Hlimlai ni reng a nei lo ve,
Hringnun piah ram ngaiin.

Aw, ka ngai par ang an vulna,
Nun thing zar hnuaia lungduh an liamna;
Raltiang ram khian,
Awi! kei ka lung min len.

I ram ngaitute'n hmangaihna,
Enchim loh par a mawi an ti;
Hringmi inhmangaihna hi zawng,
Doral an chang leh thin.

Aw, lo kal la, ka chhamdamtu,
Lawmlai ni hian leiram hi zawng;
Lungngaih chhum a lo zing leh thin,
I ram ka ngai mang e.

Aw, fam rihtlang mual liam hnu te,
Tawn leh ni awm thei ngai ang maw?
Lalpa lokal leh niah chuan,
Kan lawm a kim tawh ang.


25 Jun 2013

Kawng zim zawh tan ka lo ni

Kawng zim zawh tan ka lo ni

Phuahtu: Lalsangawi
Satu: PBK Liankhuma

Lal Isua ka neih chinah chuan,
Kawngzim zawh tan ka lo ni;
Ka duhzawng thil tih te chu a rem tawh lo,
Ka chantawk ah lungawi in harsa in hreawm ila;
A duhzawng a awm turin Lal Isuan min nghak reng e.

Ka hringnun hi aw a ral hunin,
Ka tlantu hmelmawi duhawm chu ka hmu ang;
Tahchuan ka lei mittui hi min loh hrukfai sak ang a,
Ropuiin ka leng tawh ang Lal Isua ka neih vangin.

Lei hausakna lalna leh ropuina nei lo mah ila,
Lal Isua neih hi ka tan a tawk e;
A hmel chhiat tur ka phallo,
A hming chuai an ka phallo;
Ka engkim a engkim chu Lal Isua chauh hi a ni.

A harsa e khawvel hi zawng,
Lungawina reng a awm lo;
A sang zawk beiseina in hmun a luah zo,
Enge ka buaipui thin a engahnge ka lungngai thin;
Lungawina kim Lal Isua ka rochan hlu a ni si.

Esauva Silhfen

Esauva Silhfen

Phuahtu: Buonglienkung
Satu: ICI Central Choir, Lalruotmawi

Lalpa, ka sualna a tam a,
Mihringa chhiar tlak ka ni lo;
Mahse, i hmangaih aw nem chuan,
Duattein min lo au reng si.

Ka aw hi Jakoba aw nimahse,
Esauva thuam ka in bel si;
Roluahtu tur Krista silhfena min thuam mai hi,
Lalpa, ka phu lul lo. 

Ka aw hi bumtu sual aw ang,
Jakoba aw ang mai lo ni;
Esau silhfen Kristaah chuan;
Ka sualna te min ngaidam ta.

Ka sualnate khuhbo tura,
I tuarna hmel ka en ngam lo;
Phurual loh hmangaihna mak chuan,
Chatuan nunna min lo hlan si.

Ka tlinna leh ka mawina ber,
Nang ngei Isu ka neih che chuan;
Tu dang reng ka ngai tawh lo e,
Engkima ka engkim i ni.

24 Jun 2013

I tap thawmah i Lalpa a tho ta

I tap thawmah i Lalpa a tho ta

Lettu: Rev. Remlalfaka
Satu: Mizoram Synod Choir (2012-2014)

Zirtirte chu Lal Isua nen,
Tui chu kanin thlamuangin an awm;
Thlipui hlauhawm chuan a rawn nuai a,
A ni chu lawngah chuan a mu si,
"Kan boral i duh em ni?
Tanpui ngaiin kan rum a sin,"
An au thawmah Isua a rawn harh;
"In rinna khaw'nge." tiin a zawt.

Zankhua a tawngtaiin,
I chakna hmang zovin i rum maw?
I au thawm chuan i Lalpa a kai tho.
Aw, i aw a hria,
Lawma banphar tur i ni e;
I tap thawmah i Lalpa a tho ta.

Inrin loh laia lo thlengin,
Thlipuiin a nuai vel che a;
Beiseina zawng a bo ta maw,
Beidawngin thlaphangin i awm a;
I lawng chu tuiin a khat mek a,
Tuipuiah chuan i boral ngei dawn;
I chhandamtu tanpuina i au a,
Bansan thei hian i mawi si lo.

I mangan laiin a muhil si maw?
Thlipui hrangin a nuai che;
Tui thuk tak chungah,
Mahse, lo nghak hram rawh;
Muanna lo thleng tur chu,
A tawngkam khat chauh pawh ;
I tan a tawk e.

(He hla hi ' sap hla 'Your Cries Have Awoken The Master' tih atanga lehlin a ni e.)



Buannel ram dai

Buannel ram dai

Phuahtu: Rokunga
Satu: Tuithiang veng Branch YMA Silver Jubilee Choir 

Thlaler ram reh hla takah chuan,
Chhuihthangvala lunglenna;
Buannel ramdai kawlvalenchham,
Nghovar leh Chawngtinleri tuallenna.

Tahchuan achangin lung a leng thin,
Ram chhawlthing te par vulna;
Zantlai ah riakmaw valengin,
Thiang thingzar mawi e sianglawi nan.

Aw a khamrang thari laikhum,
A tualzawl satin kaina;
A luikawr dung leh a tlang mawi,
A thingzar mawi thuva te zai remnna.

Sihal ten piallei a run a rem,
Vatin reng te thingzar ah;
Zantian chhawrthla leh siar,
An en chang hian lung a leng zual thin.

Pasaltha leh ramvachal ten,
Ziatial dar ang an chhaina;
Huaivawm khite leh zuki ten,
Siktui thiang dawn a nau ang an nuihna.

Tahchuan ka thinlai a cham reng mai,
Chhuak in ram va tuan ila;
Chengrang chawiin uisathiam nen zelin,
Vala lungdam na.

Buannel ramdai ah va tuanin,
Chhuihthangvala hmingthanna;
Chengrang tui lungleng a au ve,
Damsa hraileng awi zawng te tlan dial dial.

Than haw chhuithangval ram tuanin,
Sahrang lu a rawn hawn e;
Lawm ru lawm ru val ka than nan a e,
Vangkhaw run zau ah.


Nghilh bik suh Rinpui

Nghilh bik suh Rinpui

Phuahtu: Lallianmawia Pachuau
Satu: Lallianmawia Pachuau, Lalruatfela Pachuau

Sulhnu chhui leh nunhlui ngaihzawng,
Awmkhua a va har lua e;
Ka ngai em che, ka ngai vawng vawng che,
Ngaihzual, ka ngai em a che.

Eng vang nge maw nang nen kan intawn?
Nghilh ni reng i awm si lo;
Laikhum zala tlaikhua kan var lai,
Nghilh bik suh aw, Rinpui.

Hmangaih biangah kan fawh lai khan,
Ka dawn ngai lo, sam ang then;
Lungchim tea biahthu hlan lai te,
Han dawn ve ang che aw.

Bawihte, eng dang vang mah a ni lo,
Ka tling zo lo a ni e;
Suihlung chhirin lo kir bik lo la,
I tan ka rem tawh lo ve.


23 Jun 2013

Chawngzawng pawh hawisan lotu

Chawngzawng pawh hawisan lotu

Phuahtu: BT-a
Satu: Mizoram Synod Choir (2012-2014)

Zing tian kawl a lo eng,
Thlang lam panin a her liam;
Thilnung tinte duhsam,
Sik leh sa hunbi kim a her chhuak zel.

Lalpa i remruat ropui ril zia hi,
Dawn changin mak ka ti thin;
Chawngzawng pawh hawisan lo tu chuan,
A mah ringtu te chu a hawisan ngai lo.

Tuiluang leh tuifawn ten,
Lalpa faknan ri an chhuah;
Thinghnah leh thlifim ten,
Thil siam tin reng te sawmin zai an vawr.

Thilsiam te enkawltu,
Nang leh kei hi kan ni si;
Thilsiam zawng te Lalpa,
Kan nunna hian a fak zo silo.

Thiamthu sawi thei ka ni lo

Thiamthu sawi thei ka ni lo

Phuahtu: Buonglienkung
Satu: Lalruotmawi

Lalpa, i mi hruai dan hi ka ngaihtuah hian,
Dikna laltiang chu i ta a ni lo'm ni;
Rinhlelhna chhumpui hnuaia ka lenlai hian,
I thlarau tanpuina chu ka va ngai em.

Mihring ramah thiamthu sawi thei ka ni lo,
Ka tana i tuarna hi ka ngaihtuah hian;
Dawta sual tinrenga an hek lai che khan,
Ka damna turin thih thleng i lo tuar si.

Mite ngaihdan chuan suamhmang mai ka lo ni,
Mahse, ka nunah hmuhchhuah tur awm si lo;
Nun chau leh beidawng takin ka rawn pan che,
Ringhlel tute chu nangin mi hneh sak rawh.

Ka lei beiseina te chu lo thlawn mahse,
Nang chu ka phaw leh ka kulhpui i ni si;
Lei lalthutthleng leh lallukhum tlawm hun chuan,
Kan thil tihsual te puanlan ala ni ang.


Ka hausakna Lalpa

Ka hausakna Lalpa

Phuahtu: Rev. H.P Runremthang
Satu: Lalroutmawi, Bawngkawn Pastor Bial Zaipawl

Lei anchhedawng ka khualzinna he lei hreawm ah hian,
Harsatna leh hreawmna in min bawm;
Inghahna tur reng ka nei lo,
Tlantu ropui Lalpa hnenah chauh lo chuan.

Khawvel hausakna ropuina leh, 
Chawimawina neilo mah ila;
Hausa ka lo ni Krista zarah,
Chatuan hmun in nuam leh ropui chu ;
Ka tana buatsaih a lo ni,
Haleluiah ka hausakna chu Lalpa ah a ni.

Endawng hmusitna leh sawichhiatna te tawk mah ila,
Ka hmaah Lalpan a lo phur zo ta;
Anchhedawng ka Lalpa ngei chuan,
Ropuina leh chawimawina chu min hlan ta.

Krista retheih puitute chu mi hausa ber anni,
Khawvel hreawmna hian phuar vel mahse;
Hausakna neitu Lalpa chu an nun atan,
A lo in pe ta si a.

Ka neih thil rosum in lei dawn ila ka Lalpa chu,
Ka nei lawng chatuan chatuan thleng pawh in;
Mahse Pathian hmangaihna in,
A thlawnin min lo pe ta ka nunna atan.



Ka Lal lenna

Ka Lal lenna

Phuahtu: V. Hawla
Satu: Bawngkawn Pastor Bial Zaipawl

Ka Lal lenna Jerusalem thar chu,
Fakna rimawi nen ropuinain a bawm;
A ropui zia tawngtin reng te'n hril thin mahse,
A chanve pawh an hril zo lo.

A chanve pawh an hril zo lo,
Khawpui mawi chhung Lal chungnungber Lalna;
A chanve chanve pawh an hril zo lo.

Mithianghlim zawng zawng leh angel var te'n,
Khawpui chhungluma'n tlang mawi chi tinreng nen;
Thangthar tiau zat ral hnu pawha thar zel tur chu,
A chanve pawh an hril zo lo.

Hnamtin, chitin zingah chhiarsen loh te,
Mitin Beram no Lalna ramah an lut;
Thlarau tam tak khawpui chhung lutte lawmna chu,
A chanve pawh an hril zo lo.

Hnehtu leh nunna bua hming ziak te,
Ka Chhandamtu chuan a buatsaih sak a ni;
An thawhrimna chawlhsanin Chhandamtu zarah,
A hausakna an chang tawh ang.

- Mizo khawhar hla -
Pialral ram nuam

Pialral ram nuam

Phuatu: Pastor Chhawna
Satu: Lalroutmawi, Malsawmtluangi Fanai

Pialral ram nuam ka thlen ve hun chuan,
Khawvel boral tur ka chhuahsan hnu leh;
Aw, hringlam taksa ka ngai lo vang,
Nun hlun thing leh Lalpa ka vuan ang.

Aw ka chak em pialral ram nuam,
Tho leh fate tuallai an lenna;
Thihna lusun tahna a reh ang,
Aw pialral, ka tan lo in hawng la.

Churam ka thlirin ka lung min len,
Beramno leh a tlansa te an leng;
Aw, khawvel ngai lo vin min hnuchhawn,
Churam chu ka la thleng thei hrih lo.

Nakinah khua a lo la var ang,
Tih ka hriatin ka tah lai ka bang thin;
Lei hreawmna min tuamtu te hi,
Ka pel ang chu ram ka thlen hun chuan.

Chutah hmanah tuara hliam hnu te,
Hlim takin an leng e, rethei fate;
Chhandamtu leh a tlansate nen,
Aw, then lo va kan len hun tur chu.


- Mizo khawhar hla-
Min hlan rawh

Min hlan rawh

Phuahtu:  RDee Ralte (Dreamhunter)
Satu: Dreamhunter Band

Ka thinlaina tidam tur hian,
Tleitir mengmawi, ka thlang ber che;
Duhthu ai ang han sam chang hian,
Nang lo chu tling zo an awm lo.

Ani'n sirah min hnawl tawh mah se,
Nangin ka tang i rawn belh chuan;
Ka thinlaina a dam ngei ang,
Tudang ka ngai tawh bik lo'ng.

Aw mengmawi, ka sawm che,
Then loh biahthu tiam puia;n;
I hmangaihna thianghlim chu,
Min hlan rawh, ka lunglawm nan,
Aw, min hlan rawh.

Zofa tleitir hei zawng zingah hian,
Ka thlang ber che ka tang bela'n;
Duhthu aiang han sam chang hian,
Nang lo chu tling zo an awm lo.


22 Jun 2013

Vanah lawmman

Vanah lawmman

Lettu: Rev. Lalhunliana Royte
Satu: Vohbik, Maruati

Hun leh kum te an liam a,
Fiahna vawitam paltlang hnuin;
Mittui far zawng ten hei hi min hriattir thin,
Tuarna zar a malsawmna chu.

Tlangkarah turni vawitam a liam tawh a,
Luipui lian vawi tam ka daikai tawh a;
Leiah lungngaihna, hrehawm tuar mah ila,
Vanah lawmman ka tan a awm.

Thlaler ramro ka thlen changin,
Kalna tur reng hre lo vin ka buai thin;
Mahse, Lalpan min hmuhtir, kawng nuam chu,
Chatuan rammawi ka thlen theih nan.

Chatuan ram mawi ka thlen hun chuan,
Lawma zaiin then takte nen;
Chatuan Lalpa chu kan fak za ang a,
Kraun hlu tak chu ka chang tawh ang.

-----------------------------------
He hla hi saptawng (English) 'Too much to gain to lose' tih hla atanga Mizo tawng a lehlin (translate)  a ni, he hlaphuahtu (composer) chu  Dottie Rambo a ni, kan blog min hlut sak tu ten  a saptawng hla thu in lo hriat duh takin ahnuai ah hian kan rawn tarlang tel ve bawk e:

Too many miles behind me
Too many trails are through
Too many tears help me remember
There's too much to gain to lose.

Chorus
Too many sunsets lie behind the mountain
Too many rivers my feet have walked through
Too many treasures are waiting over yonder
There's too much to gain to lose.

I've crossed the hot burning dessert
I was struggling the right road to choose
But somewhere up ahead there's cool clear water
And defeat is one word i'll never use.

Oh, too many treasures are waiting over yonder
There's too much to gain to lose!



Phai ram chul hnu

Phai ram chul hnu

Phuahtu: Lalsangzuali Sailo
Satu: H. Lalchawimawii, Rebecca Saimawii

Phai ram chu lhnu ka fan changin,
A zual thin e, nang ngaih lai hi;
A hmun leh tlangte dang si lo,
Ka thlir ning thei lo e.

An vul leh thei tak ang maw e,
Ngaihlai di kan nunhlui;
A chul leh uai mai tura'n zawng,
I phal dawn bik em ni?

Chhun khawhar nisa sen hnuaiah,
Engtin lo awm ve che maw e;
A sei ngei dawn e, i zun ngaih,
Sulhnu mahte'n ka chhui.

Inthen nan khua a sei em mai,
Nang nena kan hlim, kan nuihna;
Tuanna tlangte dang rih mah se,
Han dawn ve ang che aw.

I liam ta, mualzapui danah,
A dai chuang lo i hlimthlaleng;
Nang nen kan tuanna fan changin,
I rauthla tawn ka nuam.


 
 


Khawkhawm hla

Khawkhawm hla

Phuahtu: Suakliana
Satu: Siampuii Sailo, H. Lalchawimawii

Kan hun tawn zingah Khawkhawm a pawi ber mai,
Zoram hmuntin khawtlang puan ang a chul zo ta;
Tlangtina mi hruaikhawm nunau mipuite'n,
Chhunrawl an van, riakmaw iangin an vai e.

Kan chatuan Pa vangkhua ka ngai zual thin,
Lungduh lenrual an kimna khawpui thar nuam;
Min hmangaihtu Lal nunnema tuallenna.

Chhung kim tea, aw, lenrual lungduhte nen,
Zai kan vawrna Vanlal run leh khawtlang a dai;
Thuva awmhar chun tawng lote'n an nghak e,
Zarva lenna ram dai, aw, an chang zo ta.

Ka dawn sei ngam lo kan ram lungngaihna hi,
Sappui lungfing mingo valin hnutiang min chhawn;
Kan ram riangvai boral tur tungding turin,
Rairah chhantu chung Pathian ka ngai vawng vawng.

Kan sualna zawng zawng, Lalpa, min ngaidam la,
Zion par mawi Thlarau Thianghlim, min hruai zel la;
I chatuan ram hmun mawi nuam ka thlen hma chuan,
I kut chakin min chelh la, mal min sawm rawh.




Khawtlang lunglen

Khawtlang lunglen

Phuahtu: Lalremsanga Hnamte
Satu: H.Lalchawimawii, Maria Khiangte

Chinlai lenrual lungduh zawngte u,
In dawn ve thin em khawtlang lunglen?
Hlimlaini leh lawmlai zan zawngte,
Khuarei tawnmang mai an chang leh thin.

Aw, hlimlai ni puan ang chul tur leh,
Hai ang tar sakhmel par ang a chuai tur hi;
In dawn bik em ni thinlai dam te'n?
A leng lawk e, kei zawng, ka dawnin.

Chawrtin duah hnah nem leh par zawngte,
Khua thal lo veiin uaiin an til;
Chuti'n hlimlai leh sakhmel par pawh
Chuaiin an liam tur ka ngai ngam lo.

Zanmu chhin reng hi a har thin e,
Hei hi maw an sawi khawtlang lunglen;
Tanglaia'n min hmer, a leng vawng vawng,
Luaithli nul reng hi ka bang thei lo.


Kumtluangin aw mangtha

Kumtluangin aw mangtha

Phuahtu: Zira Hnamte
Satu: H.Lalchawimawii

Zanin chung chhawrthlapui eng ruai khi,
Awmkhawhar tizual tu maw lo ni;
Mualzapui dana leng ka ngai, nunhlui te nen.

I tiamthu di zawng te,
Lairilah a cham reng;
Kumtluangin, aw, mangtha,
Dar ang tawn leh hma zawng.

A rem em chhemdamthli chhem kiang rawh,
Nghilh loh di hliahtu vanrang chhum saw;
A zing riai hmatianga'n kian ni awm ve ang maw.

Inthenin mual chu liam mah ila,
Biahthu di hlan zel ang aw nang nen;
Englai paw'n ka nghilh lo'ng kawptea kan lenna.

Riahrun ka bel ngam lo hmatiangah,
Chhawrthlapui a lo eng leh ta e;
En ve rawh, rau i thla tah tal khian leng hmun se.


Luah loh lungdi

Luah loh lungdi

Phuahtu: Lalzova, Darchhunga, Vankhama (He hla phuahtu ber hi a chiang lo)
Satu: H. Lalchawimawii

Ka rawn fang leh hmana kan tuanna tlang,
Tuahpui leh vau an vul leh ta;
Kan sul-i-hnu khuarei an chang zo ta,
Hring leh thar hnahnem te'n lo bawm.

Tawnmang em ni, lung lem ka nei lo,
Ka hawi vel a, ka tawng si lo;
Zunleng erawh a cham tanglaiah,
Luah loh lungdi, nghilhni i awm lo.

Hmanah chuan e, a bahsam thlai mawiah,
Ka thliah senhri nauban a tawn;
Tunah erawh vul leh sang thinglerah,
Thliah loh te'n par vul tang' an ti.

Tawnmang si lo maw kei zawng ka ring lo,
A mi tawnah zamual i liam;
Kumtluang kha chen kha sul ang ka zui sa,
Heti maia ka then tur hi.

Tawnmang lamah kan zalna run dang lo,
Hai ang thang suihlung lam vai e;
Ka chul ruai ruai kan zalna laikhum hi,
Ka thlehnem puan mai a lo ni.


21 Jun 2013

Lalpa ka ngai em che

Lalpa ka ngai em che

Phuahtu: Lalhlimpuia
Satu: C. Lalhmingmawii

Tuifinriat zau lawngchhiat tawk ten,
Khawmual an ngai angin;
Ka nun chau thlalera vakvai hian,
Lalpa, nang a ngai em che.

Ka nun hian harsat, buainate,
Thlemna te tawk mahse;
Nang ka mamawh a dal chuang lo,
Lalpa, ka ngai em che.

Rinnaa huaisena chaka,
Awmturin min pui la;
Nangmaha chhuak beidawnna neiin,
Ka nun ti thianghlim ang che.

Harsat, sawichhiat, endawng karah pawh,
I thu tha ka hriatin;
Lawmtakin ka nun chau a har thin,
Nang nen nun a kim ngei e.

Seraf, Angel zingah cheng ila,
Khawvel thil zawngte hian;
Nunkhawhar chauhna min siam tawh lo'ng,
I hnen ka thlen hunah chuan.



Kan va ngai dawn em

Kan va ngai dawn em

Phuahtu: Ch. Malsawma
Satu: C. Vansanga, All stars (Mizo artists) 

Suihlunglen tinkim ka han dawn a,
Hlim tea kan lenlai ni zawng te;
Tawnmang mai an chang tur hi,
Kan va ngai dawn em.

Lawmlai kha lenlai ni zawng,
Hlimlai ni te kan va ngai dawn em.

Aw, khawnge lenrual hlui zawng te kha?
Suihlung ruala leng lungduh zawng te;
Min dawn ve hian ka ring thin,
Lungduh zawng te khan.

Suihlung ruala leng lungduh te nen,
Engtikah tawnni her leh ang maw;
Damten tawnni her leh se,
Chung khuanu zarah.



20 Jun 2013

Kan hneh ngei dawn

Kan hneh ngei dawn

Phuahtu: Dr.Ramdinthara Sailo
Satu: Davida te unau

Zan a lo thleng mek e muanglovin bei ru,
Zamlovin sual ral chu do zel ru;
Dak la han thlir vel teh lanu val rual te,
Sualna turin fam a chan tir e.

Hnehna puang chhuak rawh u,
Lal Isua hmachhuan in; 
Boral mek te chhanchhuak thuai rawh u,
Kan hneh ngei dawn a ni sual thiltihtheihna chu;
Kan hneh ang hnehtu Pathian vangin.

Thlir la kan Zoram hi aw a pawi ngei e,
Kil tinah sualral a hrang zual e;
Harh a hun tawh em e Lal sipai rual te,
Hnehna hla nen ram i la ang u.

He khawvel thim zing ah eng atan min tir,
Hlau lovin sual thim i tawn ang u;
Kan Pathian hrin chuan khawvel a ngam zel si,
Rinna in hnehna chu kan chang dawn.


Lal Isua hnenah

Lal Isua hnenah

Lettu: Lalhmingthanga
Satu: Bethsy Lalrinsangi, Stacy Punte

Isua hnenah ka buaina ka thlen ang,
Ka mangan leh lungngaina zawng nen;
Ka tan a rit lua e, ka sual phurh hi,
Isua chauh min hmangaihtu a ni.

Lal Isua hnenah, Lal Isua hnenah,
Ka thlen ngei ang, ka phurrit zawng chu;
Ka tan a rit lua e, ka sual phurh hi,
Isua chauh min pui theitu a ni.

Thiantha, ngilnei, zaidam, Isua hnenah,
Ka buaina zawng zawngte ka thlen ang;
A hnen ka thlen hun chuan a kiang ngei ang,
Buaina leh lungngaihna chhumpui zing.

Thlemna chhumpui karah lengin ka ngai,
Chhandamtu ka ritphurh chhawk turin;
Buaina zawng zawng a hmangaihna ramah,
A bo vang ka Chhandamtu kiangah.
 
He khawvel hian sualah min phat si thin,
Aw, ka thinlung sual thlemin a awm;
Ka thlen ang, Isua hnen min pui turin,
Khawvel sual ka hneh theihna turin.



Vau thla

Vau thla

Phuahtu: Lalsangzuali Sailo
Satu: Lalsangzuali Sailo, Zosangliani, Dam Veng Branch YMA Zaipawl

Ka hawi vel turnipui sensa hnuaiah,
Tuangtuah leh vau par tin an vul chiai e;
Thlirin mualtin romei a kai chiai e,
Enchim loh, aw, vau thla engah.

Aw, Siamtu kutchhuak reng lo ni e,
An fak ning lo hramthiam awmawi zawng te'n;
Thlir ve teh u, khuatin an mawi hluan e,
Enchim loh, aw, vau thla eng nuam.

Sik, nipui tuar hnu thing lenbuang zawng pawh,
Chawrtin duatin hnahnem chhuah hring nghial e;
Zaitin remthiam - lelthang, ngirtling chenin
Vau thla ni eng an awi bang lo.

Tlainema'n hringfa zaleng naunawi te'n,
Van dumpawl riai boruak thiang leng kara'n;
Lengtin kaina sumtuala'n nui hiau e,
Thlang tlai liam hnu kawleng hnuaiah.

Aw, partin, nungcha leh hringnun chen hian,
An ral leh thin, ni rei leng thei lo hian;
Mahse, vau thla hun mawi ber leh duhawm,
Chamreng mai la, pialleiah hian.





Lalpa chaklo mah ila

Lalpa chaklo mah ila

Satu: Maggie Malsawmzuali

Lalpa chaklo mah ila,
sual lakah min chhandam rawh;
Chutin ka lung a awi ang,
I hnenah vengin min awm rawh.

Nangmah hnenah awmzel hi,
Aw Isu i phal lawm ni?
Nitin i hnen a awm hi,
Phal mai rawh, Lalpa phal mai rawh.

Min hruaila, aw Isu, min kai la,
Min hruaila, aw Isu ,min kai la,
Hnehna ka chan theih nan; 
He ka khualzin kawngah hian,
Englai pawhin i chakna in min hruai la.

Ka nunna chaklo tak hi,
Lo tawpin hun a ral ang;
Him takin min hruai kai la,
I khawpui mawiah i hnen ah.


Hmangaihna vanduai

Hmangaihna vanduai

Phuahtu: Vanlalruati
Satu: Vanlalruati, Deborah V.L Hmangaihi

Lungrun, nang vang zatlang rel ka phur,
Han dawn ve la, aw, hrilh ka hai;
Lem ang min der mai hi,
I tum reng em lo ni?

Hmanah biahthu min hlan lai khan,
Min tiam kha i runlum nuthai chang turin;
Mahse, tawn loh kar rei lo te pawh,
I tan hrui ang a sei lua e,
Hun kha leh chen sul ang ka zui kha,
Sam ang min then ta si a;
Hei hi maw an sawi hmangaihna vanduai?

Lam ang letin lo kir leh mahla,
A rem tawh lo, aw, tuahloh di;
Enga'n ka lo tawn che,
Suihlung mawl vang a ni.

Nemte'n i thai chu pawm ta la,
Kei pawh tuanzai ka rel ta'ng e;
Hlimte'n fanau maltluan chawi la,
Kumtluang atan mangtha, mangtha, mangtha.



Lunglen tizualtu

Lunglen tizualtu

Phuahtu: Rualthankhuma Chhakchhuak
Satu: C Vansanga, Zualbawihi (R.Lalhmangaihzuali)

Han thlir ve teh u, chhawrthlapui eng ruai khi,
Runtin enin a her liai thangvan sanga'n;
Theih chang se, aw, kawplai di nen,
A engmawi lawmin hlimte'n amdun ila;
Tlaikhua var pawhin e kan thlir ning lo'ng e.

Lunglen tizualtu, aw, zan lalnu,
Kian zai rel mai lo vin la cham rih la;
Ka lenrual lungduhte'n lo thlir ve se,
Min tuarpui ve ngei ang mahriak lunglen.

Min ngaihzual tir e, nunhlui mualliam hnute,
Lungrual pui di nen kan hlimlai ni te;
Thamral maia'n ka phal mawlh lo,
Min dawn ve maw a riang lungmawl lanu;
Chhawrthla eng hnuaiah pawh ka kiu vawng vawng e.



Ka nu, ka nu min hrilh rawh

Ka nu, ka nu min hrilh rawh

Satu: RTC Lalduhawmi, Maggie Malsawmzuali

Khawvel hi a boral mek,
A chakna te chawpin;
Sualna te a pung zel si,
Hun tawp chu a hnai tawh si a.

Ka Nu, ka Nu, min hrilh rawh,
Kawng dik Krista chanchin hi;
Ni tin min hrilh la, 
Ka bo, ka pen thin loh nan.

Eng kawng nge ka zawh mek hi,
Kawng dik min hrilh thei em?
Lalpa'n i hnenah kei hi,
A pek che ka ni lo vem ni?

Amawh tunge phur ang le?
Zantin ka bul a zal;
Chawhlui ka kil pui thin te,
Ka chun leh zua ngei an ni ang.

Vanramah ka tel lo vin,
Hlimin i kal ang maw?
Hremhmun atanga au chein,
Ka Nu, min chhan thei ange'm le?

(He hla hi 'Nute ni' - Mother's day a sak a tan a remchang khawp ang.)
Jeremia a au asin

Jeremia a au asin

Phuahtu: C. Ropianga
Satu: Baby, Mafaki & Larry.

Kawng chhinchhiahna te insiam la,
I tan kawng kawhhmuhnate phun rawh;
I van chhuahna lam kawng ngei chu chhinchhiah tlat la,
Aw ringtu, i pianna ramah lo kir leh rawh.
(I rinna fiah a awm hun chuan)

"Tap lo turin i aw chu sum la,
I mittui hul rawh se;
I thiltihin lawmman a nei dawn e,"
Tiin, Zawlnei Jeremia a au asin!

Nang muhil, harh la, hmanhmawh rawh,
I tan kawng an hawn lai hian kal la
Kalvari lamtluang ngei chu peng lo vin zawh la
Aw ringtu, i damna krawsah lo kir leh rawh
(Lalpa thununa i awm lai hian)

Nuam hnualsuat turte hrethiam la,
Tisa thil thihsan tawhte phumin;
Simna thinlung nen Krista hnen thleng ngei turin,
Aw ringtu, i pianna ramah lo kir leh rawh.
(Vanduaina pawh lo thleng thin mahse)


18 Jun 2013

Lungduh di then chu / Hawilopar lo thliah ve ang che

Lungduh di then chu / Hawilopar lo thliah ve ang che

Phuahtu: Vanlalruati
Satu: Vanlalruati, Zomuanpuii, Malsawmtluangi Fanai

Han thlir vel ila kan chhuah tlang saw,
A ngui ruai e hmanah kan tuanna tlang;
Hmanah ai ang sam a kan belh thingsiri par,
An uai zo ta nunhlui ka tawn ah.

Awi maw ngaiten vulreng si e,
Ka chantawk a hlimthla mai hi;
Kumtluang lunglen pui tur reng a,
Rihsang mual i liam ta si a;
Va kal ta la kei ta tan pawh,
Hawilopar lo thliah ve ang che

A saw tlang romei zing ri riai sawn e,
Ka lung min len min hnem zo an awm lo;
A lo her liai liai e engtak min hlan ang maw,
I tawng em sirvate ka di ve kha.

Mittui nen ka rawn fang leh i sulhnu,
Biahthu kam khat tal min hlan dawn lawm ni;
Parthi ka rawn hlan che nemten lo chawi nang che,
A na em lungduh di then chu.



Ka van in khi ka ngai mang e

Ka van in khi ka ngai mang e

Satu: Maggie Malsawmzuali

Khawvel ah hian aw ka Lalpa,
Khawhar takin ka awm fo thin;
Sualna chhumpui a lo zing buai,
Ka nun a chau zo ta.

Ka van in khi ka ngai mang e,
Lei ah chawlhna ka hmu silo;
Ka chhandamtu lenna ram ah,
Chutah lungngaih buai reng a awmlo.

He lei hi zawng tah leh rumna,
Hmusit elrel a bang silo;
Ka van in mawi engnuam ah chuan,
Mittui zawng a hul ang.

Lungngai beidawn harsa kar ah,
Chhel huai takin i kal zel ang;
Kan tuar leh thawhrim lal hma ah,
A la par mawi dawn si.


Mengmawi

Mengmawi

Phuahtu: Nono-a & Remmuana
Satu: Lalmuanpuia (MPA) 
Album: Project Mengmawii

Nang ang thinlai khamtu,
Tawng hian ka mawi silo;
Tleitir mengmawi (nangnen hmeltha)
Nang nen a runhmun kan len dun ve nan
Ka nghakhlel khuanu hun ruat tur chu.

Mengmawi, nang nen a lendun ka nghakhlel,
Khuanu samsuih ngei kan ni si;
Mahriak a damchhung hman ka zuam lul lo,
Ka zuam mawlh lo.

Hun kha leh chen ka tan tuarin i hmang zo,
Dawhtheih na nen ka tap mittui nen;
Hreawmna leh  i tawrh ka han dawnin,
Athlawn mai atan ka phal thei lo.

Hringnun lamtluang chhui dun zelin,
Hmangaihna par tlan zel ang hallo ten;
Chutin leilawm a kim ngei ang.

I kimtlang leh i pianzia a mawi chuang kei ka tan,
Val dang tawnah her mai tur an;
Ka phal lo che, her lul suh mengmawi te,
Runhmun len i tlang ang kumtluang in.



1 Jun 2013

Lenlai a rual lo

Lenlai a rual lo

Phuahtu: Englandthanga (Saitual)
Satu: Sailothangi Sailo, Zioni Renthlei, H. Lalremruati

Mahriak awmhar niin,
Tin kim ka han dawn a;
Luahloh tur di zun a uai chu,
Tuar a har, luaithli nul a awl ngei e.

A rem lo nang nen a len dun hi,
Eng dang vang a ni lo, lungrunpui;
I pian a tlai kei ka hma si a,
Lenlai a rual lo hi a pawi ber mai.

Runah hraichawi leng nen,
Hlimni awm thin mahse;
Nang ngaih ka bang thei dawn si lo,
A ruk te'n luaithlipui ka nul leh thin.

Khuanu samsuih loh chu,
Inthen zawk mai ang aw;
Thenna'n hawilo par min thliah la,
Mangtha aw, damtakin, mangtha mai le.








Ka nuam ve e

Ka nuam ve e

Phuahtu : Butta (Vulmawi)
Satu: Butta, Vanlalruati, Lalrindiki Khiangte (Daduhi), Lalpanliani

Tlang tin mual tin thing tin zar belin,
Va tinreng kawp lai di nen;
Lenlai ni chen lungrual te'n an leng siau e.

Zobawm dingdi, tlangsam par sirsiar,
Lentu chhawl hnawng ram daiah;
Rem sa leng rual te'n hlimin sam an chai e.

An leng e, hlimlai chenin,
An ngai lo, tleidang par he lei chinah;
Ka nuam e an ianga,
Hmatiang dawn ngai lo hmun nuam;
Aw...aw...awm ve ngai maw hringnun.

Vau, tuahpui leh chawnpui par zawng te,
Vul lai rel an kur siau e;
Romei zam chiai zing riai nen thal an mawi e.

An par e, vul lai chenin,
An ngai lo, tleidang par he lei chinah;
Ka nuam e an ianga,
Hmatiang dawn ngai lo hmun nuam;
Aw...aw...awm ve ngai maw hringnun.



Khawnge i awm? (Dam takin mangtha)

Khawnge i awm? (Dam takin mangtha)

Phuahtu: Darthuama
Satu: Darthuama, Joseph Zaihmingthanga, Biakmuana, Sangtei Khuptong, Joseph Fanai

Ka hawi vel a nang ngaih a zual leh thin,
Kei ka di ve kha, khawnge maw i awm le?
Aw, khawnge maw i awm le?

Tlai nitin in ka zawng thin che,
Tawn ni reng i awm silo;
Aw, khawnge (maw) i awm le?

Leng zawng te chu a kawp ten an hlim ngei mai,
Mahse, i tel ve silo, khawnge maw i awm le?
Ka tah nan mai i lo pian.

Ka zan mang nge, luaithli hruk sen loh hi,
Ka chan tur em ni le?
Hmangaihna ka tan hian i phallo maw? a na e.

Dam takin mangtha, i sem zai thiam hle,
Kei aia hmangaihtu i tawng chuang hian ka ring lo.





Kan ram hi kan ram a ni (Zoram hi kan ram a ni )

Kan ram hi kan ram a ni (Zoram hi kan ram a ni )

Phuahtu: Laltanpuia (Sialsuk)
Satu: Lalsangzuali Sailo, MNF Golden Jubilee Zaipawl, Vanlalchhanhima Ralte

Aw Zoram, i finna leh thiam i thuhruk chu puang chhuak rawh,
I vela hnam ze hrang karah i chi, i kuangte hruai chhuak la;
Kan ram mawi tak hi Zoram tana puang turin,
Rorelna khawl hmaah zam lo, nang, kan vote ang che.

Aw Zoram, aw kan Zoram, aw Zoram, ka ngaihlu a che,
I chhunga hnam ze tinrengte lungruala kan insuihkhawmin;
Finna thlipui, hriatlohna thim hi chhem kiang la,
Lungrualna hi ram leh hnam tan himna kulhpui ber a lo ni e.

Aw Zoram, i sang zela, kea dinchhuah ve kan tum ta,
Tuna i ropuina let sang sawmthumin an rawn thlem ang che;
Kan pi pu ro, kan ram mawi tak hi chawisang la,
I hnehna puan zar la, i lu lo thinsan mai rawh.

Ram leh hnama dinchhuah nan, thiamna famkim neih kan tum chuan,
Aw, tuna kan ram dinhmun hi dawn ve la, lung a awi nem maw;
Ram leilung leh mipui zawng zawng hi tang kan ni,
M.N.. ka sawi thei lo... kan ram hi kan ram a ni.
 
(He hla hi a sa lar hmasatu, Pi Lalsangzuali Sailo khan a phuahtu phuah dan dik tak 'Kan ram hi kan ram a ni' tih lai hi a sa sual a, 'Zoram hi kan ram a ni' tiin a sa a, a phuahtu phuah dan tik tak zawk chu 'Kan ram hi kan ram a ni' tih a ni e.)


Stellar (Boomarang)

Stellar (Boomarang)

Lyric Composer: PB Lianmawia (Atea), Vocalist Boomarang
Band: Boomarang (Mizoram)

I'm floating in the stratosphere,
I'm talking to the stars;
Asking them directions of where you are,
From the meteor that passes by;
I'm guessing if you're near or far.
The earth revolves in circles,
Time goes the other way;
Everything's in slow motion,
Still you're light years away;
I'll search the solar system,
I'm thinking of what you'd say.

On my journey through inter-galaxy,
All the life forms aren't quiet like you;
They don't have the life span or capacity,
Of the light that shines from you.

(Sending my signal to you)
You are stellar (I hope that you can hear me),
Stellar (I pray that you're beside me);
Stellar  (I wish that you were here),
You are stellar (We've lost communication),
Stellar (Is this your constellation),
Stellar (I wish that you were here).

I know she changed position,
I can tell it from the stars;
She received my transmission,
She can't be far;
In the course of our collision,
I hope we don't break apart.
I'm open in the portal,
I'm showing you the way;
Come to this side of the universe, if you may,
Where all the constellations are asking;
If you'd like to stay.

(Please stay nowww...)
You are stellar (I hope that you can hear me),
You are stellar (I pray that you're beside me),
You are stellar (I wish that you were here),
You are stellar (We've lost communication),
You are stellar (Is this your constellation),
You are stellar (I wish that you were here).

You are stellar, (In the stratosphere talking to the star),
You are stellar  (Asking them direction where you are),
You are stellar (Meteor that passes by i'm guessing If you're near or far),
You are stellar (The earth revolves in circles, time goes the other way),
You are stellar (Everything's in slow motion still you're light years away),
You are stellar (I'll search the solar system, I'm thinking of what you'd say),
You are stellar (repeat 7 times).


Stellar lyrics© Boomarang Band, Aizawl, Mizoram, India.
----------------------------------------
The lyrics posted here is based on hearing from their music video and not to be considered as their original lyrics as some words may be misspelled or mistaken.
----------------------------------------
Fans may search #stellarboomaranglyrics #stellarboomerang #stellarboomarang #stellarboomarangmizoram #boomaran stellarlyrics #boomerangstellar #stellarlyrics