Saturday, 10 August 2013

Piallei hmun rem kan bel

Satu: Lalsangzuali Sailo

Aw kan Zoram nuam suihlung phang lo la,
Thlang kawrvai bawih atan ka phallo che;
Chung Pathian ruatsa i zalenna tur,
Theihtawpin kan bei zel ang.

Tlaitla in lenkawl khua a lo thim hian,
Riakmaw sirva leng iang in;
Riahna run kan vai tukloh ram dai ah,
Piallei hmun rem kan bel e.


Tukloh ramhnuai siahthing zar hnuai hmunrem,
Kei ka tan lunglai min hnemtu anni;
Silhpuan zial phelh a piallei a zalin,
Muangten zanmu kan chhing thin.

Kan ngai bil lawng e vangkhaw laitual nuam,
Ram leh hnam hmangaih mihrang valrual ten,
Thinlai muangte a ka len ve nan e,
Ka thlang thin chhawlbuk run nuam.

Lenna tlang a dang doral lian vangin,
Doral lian tui ang anla nem ngei ang;
Chung Pathian zarah hnehna ni nghak in,
Dam takin aw mangtha le.

1 comment:

  1. A hun lai ngaihtuah chuan a lunglen thlak dawn hle mai a, rambuai lai a hnam sipai te khan han ngaithla ve leh se chuan an lung a leng ve ngei ang.

    ReplyDelete