I tel lova Krismas ka hmang tur hi

Phuahtu: R Lalduhawma

Satu: Henry Lalmalsawma Renthlei

Tuantul vangin lenna tlang a dang si a,
I zunphur tan zankhua a reilua em e;
Favang ni kawla'n a lo herchhuak a,
Khua chuanin ka hawi vel a, i awm si lo;
A riang lunglen ti zual mai thlawn e.

Mi te zawng kawplai di nena leng dunin,
Chhandamtu pian lawmin lenlai an chen a;
Keizawng mahriak te'n kan run ka bel a,
Ka riang hluan e, min hnemthiam reng an awm si lo;
Duhlai, min han dawn ve thin ang che aw.

I tel lo va Krismas ka hmang tur hi, 
Tlei a har, lung a leng em e;
Ran in tlawma van nau thar pian zan hian,
Nang ngaih vangin luaithli ka nul leh thin;
Hei erawh ka di, vawng reng la, ka hmangaih reng che asin.

Ka hlan che, hmangaihna, Krismas lo thleng hian,
I tan Khuanu malsawmna dil zel nang e;
I tuanna mual atangin Remna Lal chu,
Fak hla saa chawimawiin lo lawm la;
Kan chantawk Khuanu ruat lo ni e.

Kar lam hla mahse lengdang chhai ka tum lo,
Rinawmna kan tiam Khuanu leng hming chawiin;
Nang paw'n kan tiam biahthu di vawng reng la,
Hal lo te'n kumsul a lo vei ang a;
Tawn leh ni zawng a la herchhuak ngei ang.