Monday, 23 December 2013

Krismas leh Kumhlui zun

Phuahtu: Jonathan Hmingthantluanga
Satu: Tetei Ralte

Kumpui sul pawh a her liam leh dawn ta,
Sikni engmawi ngai ten a her chhuak e;
Vanlal pianni champha damten kan thleng leh ta,
Zaleng zawng ten hranglu iang an lawm e;
Fam ngai te tan suihlung ti lengtu mai.

Hmatiang ah kan thlir hun leh kum lo thar tur,
Suihlung erawh a leng a hnim ruai e;
Kei zawng ka ngai hmanah lenrual lungduh zawng nen,
Krismas lawmin hlimten zai kan vawr kha;
Tunah erawh suihlung tileng tu mai.

Hnemtu ngaiin ka vai ruai e,
Ngaihloh ang hian an liam zel si;
Hringmi mawina par ang chulin,
Kumsul erawh a thar zel si;
Siamtu remruat dan lo ni e,
Lal pianni champha kan thleng leh ta.

Awle, kumhlui damten mual liam ta la,
Nunhlui ngai a suihlung len hruai ve la;
Hun leh kum lo thar tur hringmi tan malsawmin,
Min hlan ta che duhsak chibai buk nan;
I zun ngaih zawng suihlung a leng emai.

Sunday, 22 December 2013

Lal pian hun pangpar a vul leh ta

Phuahtu: Patea
Satu: Bawngkawn Pastor Bial Zaipawl

Lal pian hun pangpar a vul leh ta,
Thinlai mu hnu lunglen a kai thove;
Vanhnuai mihril Bethlehem tlang chungah,
Rinin thla in mi an thlawk kai.

Aw ka Lal nunnem, 
Nangin min hruai zel la,
I chun leh zua karah senlai nau ang, 
I tahna hmun tual ka ngai.

Ngaih a na e Bethlehem tlangpui,
Tlaini tla eng lenkawl a khum riai e;
Bawng in tlawm ah ka lal riangvai tak saw,
A chung riang Marin a chawi e.

Bethlehem arsi a eng leh ta,
Eden thlan kawngkhar chhung a rawn en;
Harhin tho ru Eden khua a var ta,
Kan tum ram chu i pan zel ang.

A va mawi em lalna ram thing chu,
Kan tan Bethlehem tlang a lo vul ta;
Hmanah pi leh pu ten an hmuh phak loh,
Saron par tlan in kan leng e

Thursday, 19 December 2013

I pianna ramah kir leh rawh

Phuahtu: Zira Hnamte
Satu: Bethlehem Pastor Bial Zaipawl

Pathian mihriat kan lo nih hnu pawh hian,
Nunkawng a lo buai leh si thin;
Khawvel mi hip thei thildang umin,
Lalpa chu kan phatsan fo thin.

Unau enge i dinhmun le?
Lalpa lokal ni a hnai ta;
Phatsan fo ringtu nun i neih phawt chuan,
I pianna ramah kir leh rawh.

I pianna ram chu khawnge i hmuh ang,
I aia nun petu thihna hmun;
Krista thisen luanna kraws chu,
I tan hmun him ber a ni.

Krista hmangaihtu dik tak te chuanin,
A thupekte an zawm fo thin;
Thupek te i zawm siloh chuanin,
I dinhmun enfiah thuai ang che.

Nun chawllo ringtu i nih phawt chuanin,
Thinlung thlerin a mah pan la;
Zep ruk leh sinruk i neih zawng te,
Lalpa hmaah puang chhuak thuai rawh.

Ramhlun ka sawi nin theih loh chu,

Phuahtu: Khaizadala
Satu: Bethlehem Pastor Bial Zaipawl

Ramhlun ka sawi nin theih loh chu,
Lalpan a siam ramnuam tak chu;
Chhun leh zan a awm tawh lovang,
Zion khawpui nuam tak ah chuan.

Van Jerusalem khawpui ah,
Riltam tuihal a awm tawh lovang;
Ni leh thla eng reng a ngai tawh lo,
Beramno ni ang a eng reng e.

Lalpa, i ram thianghlim ah chuan,
Thihna a awm leh tawh lovang;
Luaithli nula a inthen lehna
A awm lovang, i ramah chuan.

He lei hreawma na ramah hian,
Thihna ram pana ka penin;
Lungngai a ka awm lai hianin,
Lalpa min thlamuan zel ang che.

Lalpa, i ram thianghlim ah chuan,
Thihna a awm leh tawh lovang;
Luaithli nula inthen lehna,
A awm lovang i ram ah chuan.

Saturday, 7 December 2013

Kan chatuan Pa lenna runah

Phuahtu: Rokunga
Satu: Liandingpuii

Kan chatuan Pa lenna runah,
Van mipui te inkhawm in;
He thu ropui an zawt vel a,
Khawpui chhung hmun tin a mi.

"Tunge lehkhabu hi hawng a,
A chhinchhiah te phelh tlak awm le?"
Tiin an han zawt vel chiam a,
Tuman an chhang thei lo ve.

Van mipui chhiarsen loh zingah,
Pakhat tal in awm lawm ni?
Ngaiteh Davida kulhpui khan,
A hnehta ropui takin.

An lawm hla thawm thangkhawk riin,
Van khawpui a nghawr nghing ta a;
Van angel ten thla an khawng ri,
Khawpui chhung an hual vel a.

Pathian thuruk eng ropui chu,
A puakdarh lei thim zingah;
Bethlehem tlang a rawn en a,
A zau zel hnam tin zing ah.

Ngaiteh van mi chhiarsen loh te,
An thawm ri chu a va mawi em;
Chungnungberah ropui rawh se,
Lei chungah rem leng rawh se.

I lawm ang u vanlal ropui,
Lal Imanuela chu;
Khawvel a hmangaih avangin,
Lei sual thim ah vakvai in.

Khawvel tan a nun a pe ta,
Tunah vanah ro a rel ta;
Khitah kan inkhawm hunin,
A hmel ropui kan hmu ang.


-------------------
# Mizo Krismas (Christmas) hla (song) - hlathu (lyric)