11 Jun 2014

I hming ka fak ning lo'ng

I hming ka fak ning lo'ng

Phuahtu: Samuel Ralte
Satu: Maggie Malsawmzuali & Zoramchhani (Duet)

Ka thiam ka theihna leh, ka aw neihchhun zawng te'n;
Theihtawp chhuahin i hming ka fak fo thin;
Mahse, chu mai zawng chu ka duh tawk mawlh lo,
Ka thinlung zawng hian ka fak duh che.

Theihchang se thilsiam dangte iangin,
Fakna hla mawi chu rem ve ka nuam;
Aw, ka theihna te tlem thin mahse,
I hming ka fak ning lo'ng.

Kawtthler hmun ruak te chu ka va fan chang ni chuan,
Lungmuanna leh chawlhna reng ka hmu lo;
Krista hnenah chauh lo chuan ka nun a kim lo,
Hriat phakloh hmangaihna min chan tir.

Tu dang hriat ngai lohin ka nun a chau leh thin,
Zanthim ka tan lungngai an chang zo thin;
Rilru khawhar takin ka hun ka hmang thin,
Chhantu hmel duhawm a lo lang ta.

I chatuan hmun ropui ka thlen hunin,
Lawma zai vawr ka bang tawh lo'ng;
Aw Isu, i hnen thlen ka nghakhlel.

4 Jun 2014

Jakoba Pathian

Jakoba Pathian

Phuahtu: Sanglianthanga
Satu: Sanglianthanga

Isaka Pathianah chuan,
Khawngaihnain Lalpan kan tih ve tel lo vin;
Krista Isuaah chuan min lo tlin tir ta a,
Amakin a ropui e, hlimin ka zai zel ang.

Abrahama Pathian, aw, Isaka Pathian,
Jakoba Pathian nih pawh Lalpa'n a hnial si lo;
Kei bumhmang leh mi sual, hel hmang thin tan pawh hian,
Jakoba Pathian ngei kha ka Pathian a ni si.

Abraham Pathianah chuan,
Lalpa hnena ka dawn malsawmna zawng zawng te;
Ka Isaka ngei kha halral a ngai leh si,
Pathian intumchawpna 'Jehova Jire' ka chan nan.

Jakoba Pathianah chuan,
Ka chakna zawng zawng te tihchhiat saka awmin;
Lalpa chakna chauh chu ka lo hman thiam ve nan,
Ka ke min tibai ta, nun tam ka neih theih nan.

Kei bumhmang leh misual, hel hmang thin tan pawh hian,
Jakoba Pathian ngei kha ka Pathian a ni si.