Friday, 18 September 2015

Thal favang lelthang

Satu: Lalthansanga Ralte

Thal favang lelthang kiu leh thal khaw romei zam tur hian,
Awmhar suihlung min len lawk thinlaiah;
Tinkim dawn a rianghlei nau ang tahlai ka bang thei dawn ne'maw?
Thinlaiah parte i biah nemte,  i sakhmel a cham reng.

Luah takah parte sul ang min tum lo ka hai silo,
Tlang zarel thang ka dawn zo ve silo;
Duhleng tawnah thlang khuandim in tlang za mualpui liam mah la,
Kumtluang in parte i zun leng ngaih, i sakhming ka nghilh lawng

Tlang zarel thang thuam laiah do ka zuam lo lungrunpui,
Mat leh rial tui ang kan inthenna ai chuan;
Tuahrem biahthu di kimten hril dun ila parte run nuamah,
Nang lo chu lungkham ka dawn lungrukan duhleng an piang lo.

Kei chu awmhar nau ang tah lai ka bang thei dawn nem maw?
Mahten ar ang ka vai chhimhlei tualah;
Lunglen vanga fam dairial chang tur reng a Khuanun min siam le,
Ka tuarah lunglen khaw zo chhum ang kianni a nei lawng e.

Ka tuarah lunglen khaw zo chhum ang kianni a  awm dawn lo.

No comments:

Post a Comment