29 Aug 2017

Thihna lui

Thihna lui

Phuahtu: CT Lalnunthanga
Satu: JH Mamuani

Thihna lui thuk takah,
Ka pil laiin ka chhandamtu'n;
Hmangaih vangin min tlan,
Buaina tuifawng ka kai ta e.

Hlim takin ka zai zel dawn,
Ka chhandamtu fakin;
Chatuan ram ka thlen thlengin,
Ka chhandamtu'n min hruai zel ang.

Tunah chuan lawm takin,
Ka chhandamtu ka zui zel ang;
A hmangaih ropui hi,
Hnamtin zingah ka hril zel ang.

Van khawpui ka thlen hun chuan,
Lungngaihna ram he khawvel hi;
Ngai lo in Lal hnenah,
Chatuanin aw ka leng tawh ang.


24 Aug 2017

Tlaitla engmawi

Tlaitla engmawi

Satu: Lalruatfela Pachuau

Chelhdin rual loh tlaitla engmawi riai,
Mawiten her liam leh mai ang maw;
Thing tin parmawi ti mawi zual tu ber,
Hram thiam va ten an fak thin che.

Vangkhaw dar ang lenna zolurah hian,
Cham rih la zamual liam mai lovin;
Engmawi riai riahrun rem ve la,
Cheng zaleng rual lunglawm ve nan.

Ka thlir ning lo tlaitla eng riai ruai,
Thlang tiang kawlrawnah liam mek e;
A mawi ngei e lentu chawi zo vel,
Hramthiam rimawi thangkhawk ri nen.

Han thlir vel in a mawi zual thin e,
Lentu dampa chhawrpial hmingthan hluan;
Vul thing tin par hramthiam va nen,
Chung khuanu ruat maw lo ni le.

Tlaitla engmawi herliam iang in maw,
Hringnun parmawi a lo chuai thin le;
Chung khuanu ruat kan hringnun hi,
Zaleng zawng ten dawn ve che u maw.

Lenkawl turni thlang tlai zamual a liam ruai ruai e
An awi liam e sirva lunglen chiar hniang rimawi thang vel nen.

Chamrih la tlaitla engmawi

Chamrih la tlaitla engmawi

Phuahtu: C Lalrinmawia
Satu: C Lalrinmawia

Aw, ka thlir vel tlaitla engmawi,
Aw, i lo mawi chuang mang e;
Sakhmel thar hraileng ten lo lawm.

Chamrih la tlaitla engmawi no ruai,
La,la,la,la,la,la....
Chamrih la hraileng zawng lo lawm nan maw,
I liam tur maw lo ngui zo ta.

Kumpuisul a lo vei hian,
Hun leh ni te a lo dang;
Ka ngai thin lenrual hlui then hnu te.

Lenkawl chamduai tlang dum dur,
Leh ramdai sirva leng ten;
An lo bel e riahbuk ramdai an.

Kar hla thian

Kar hla thian

Phuahtu: C Dinthanga
Satu: Peter C Lalrinmawia, Remkimi Cherpoot

Kawlvalenchham a leng thian duhtak,
I tan thaikawi biahthu ka rawn tir a;
Aw sakhmel tawnni her lo mahse
I hlimthla thlir in thinlaiah ai ang i cham reng e.

Van dumpawl leh boruak thiang karah,
Awmhar kan ruan riangteah hian maw;
Kei lungmawl hian lungchim ten,
Ka dawng vawng vawng thin che a;
Sakhmel tawnni awm silo ka thian.

Sakhmel tawn loh kar hla thian,
Kar kar lamtluang a thui vawng vawng;
Ka thinlung chhungrilah,
I cham reng, aw ka thian.

Thaikawi biahthu ka hlan tawh che a,
I thaikawi biahthu min hlan ve la;
I samhmel leh anka mawiin lairil a fan ngei e,
Engtikah tawnni her ve ang maw.

LT a mak ka ti

LT a mak ka ti

Phuahtu: Rs Rosangluaia
Satu: C Lalrinmawia

Lungrukah duh ai ka sam thin a,
Thinlaina hnemtu tawng ve ila;
Zawlkhaw zau ka thlir vel a,
Mahriaka han len nan.

A violet by a mossy stone,
Ka tan em ni i vul le?
Ka tan Khuanu ruat reng ni teh la,
Mahte'n ka leng tawh lo'ng.

Runlum nuthai tur atan chuan e,
Suihlung i dum zo ngei ka tan;
Runlum min han nghahpui teh la,
L.T, a mak ka ti.

Tichuan, ka zawt a che, min hrilh rawh,
"I tan chauh a rinawm tumtu;"
Tia biahthu min hlan zawng kha,
Tham ral atan chuan e.

Vanglai nun (C Lalrinmawia sak lar)

Vanglai nun (C Lalrinmawia sak lar)

Phuahtu: Lalhlimpuii
Thluk siamtu: C Lalrinmawia
Satu: C Lalrinmawia

Lungkim ten ka han dawn vel a,
Lunglam ka vai, hrilh ka hai mang e;
Nunhlui mual liam hnu te,
Auh ruai ka nuam ngei e.

Vanglai nun! aw, hlimlai ni!
Lungrualtea zaitin kan vawr lai te;
Suihlung ruala lengza thin kha,
Khawia'n tuan che u maw?
A then rihsang mualliamin, 
A then lenna tlang dang si maw;
Vanglai nun! aw, lenlai ni!
Kir zai an rel si lo.

Tukram siahthing siri par,
Vaube, tuangtuah par kan belh lai te;
Duhaisam nau ang nuih lai,
Dawn ve thin che u maw?

Dar ang tawnni her leh ngei se,
Tah chuan lungrualte'n tlaikhua varin;
Vanglai nun! aw, lenlai ni!
Zaiin ka awi na'ng e.

Kan nun kalsiam hersual mahse,
A chhanna lak thiam theuh tum ila;
I chen zel ang aw, lungdam te'n,
Sakhmel hai ang tar hma hian.


22 Aug 2017

Lal hnih rawng ka bawl thei lo

Lal hnih rawng ka bawl thei lo

Phuahtu: Lalrengpuii
Satu: Pensy B Lalthangliani, Lalhlumawii (Bitei)

Chatuan atan Pa angchhungah lawmluhin  ka awm ta,
Lalte lal, hotute hotu chuan;
A lal ram ropui tak chu keimahah a rawn din ta,
Kan kara thuthlunna chu  engmahin tibuai suh se.

Ropuina, thuneihna te, hausakna, lalna te nen,
Ka Lal hmel hliahtu atan engmah reng ka phal lo ve;
A lalna daltu atan engmah reng ka phal mawlh lo,
Lal hnih rawng ka bawl thei lo, ka tisa, mangtha mai le.

Chatuan Lal hriattirna chuan ka thisen zungzam zawng  zawng,
Fanchhuakin, aw, atan min nei ta;
Ka chak zawng zawng zawng te leh ka duhdan zawng zawng te chu,
Hnawlin, aw, min thiah sak zel, tih theih reng ka nei ta lo.

Chatuan Pa, Remruattu chuan nun malsawm ka neih theih nan,
Hmuhsitna, sawichhiatna, retheihna;
Natna leh hrehawmna te, channa te chuan min vur e,
Mahse maw, a ropui e, chatuan malsawmna a ni.

20 Aug 2017

Ka enna

Ka enna

Phuahtu: Lalrempuia Ralte
Satu: Lalnunpuii Kawlni

Lungngaih ni leh chauh chang ni hian,
Ka thla chau in a rum thin a;
I hmangaihna thuk leh ril chuan,
Tui liam angin min hruai kir leh thin (2).

Nunna thukah min hruai lut a,
Ka phak loh ram min chuan tir a;
Thlamuang in ka leng tawh ang a,
Ka nunna ber chu nang hi ni (2).

Ka enna, ka enna, thim zingah ka enna,
Ka zui zel ang che, ka himna;
Ka lawm na zaiin ka fak ang che, 
Thihna luiral kan kai thlen thleng in (2).

Engpawh thleng se ka hlau lovang,
Nitin zaiin ka lam tawh ang;
I hmangaihna chuai ngai lo chuan,
Vanram thleng in min hruai tawh ang a;
Angel te nen kan zai tawh ang a.

Hmalam pan zel in eng chu thlir in,
Min hruai zel dawn chatuan thleng in. (3)

Lal Isua ka nei ta

Lal Isua ka nei ta

Phuahtu: Alvin Lalruatfela
Satu: One in Christ

Hawi vel ila kil tinah sualna a hrang,
Beisei tur avang he khawvelah hi zawng;
Muanna leh hlimna a thamral mek zel e,
Tunah chuan ka chhar ta ka tan a hlu ber chu;
Engkim a ka engkim Lal Isua ka nei ta.

Aw, Lalpa, ka sualnate i hria e,
Bosan thin che in kalpeng thin mah ila;
Min hmangaihna chu ka tan a ngai reng si,
Tunah chuan ka chhar ta ka tan a hlu ber chu;
Engkim a ka engkim Lal Isua ka nei ta.

I khawngaihna hlu tak changtu ka ni si,
Ka bosan loh nan nang in min chelh tlat rawh;
Lalpa nang lo chu belhtlak an awm si lo,
Tunah chuan ka chhar ta ka tan a hlu ber chu;
Engkim a ka engkim Lal Isua ka nei ta.

Ka tan Lapa i lo tuar kraws ah ngei khan,
Hmangaih tlak loh hi min thlahthlam ngai lova;
Nunna ka neih nan ka tan i thi si a,
Tunah chuan ka chhar ta ka tan a hlu ber chu;
Engkim a ka engkim Lal Isua ka nei ta.

Tunge ka nih enge i tan ka tih ang,
Min hrilh nawn fo rawh fak leh chawimawi che hi;
Ka tih awm reng a ni ka tan i hlu si a,
Tunah chuan ka chhar ta ka tan a hlu ber chu;
Engkim a ka engkim Lal Isua ka nei ta.


I mangan a hria

I mangan a hria

Lettu: Alvin Laruatfela
Satu: One in Christ

Khawhar tak leh mal a awm in i lo kun thin maw,
I buaina a tam si chhanna i hmu si lo;
I zawng ruai tanpuitu hmangaihtu awm nem maw,
Mahse, beidawng suh ang che i mangan a hria.

Lungngai in huanah Lal Isuan midang mut reh laiin,
Tawngtaiin a thingthi a a mittui a luang chhuak;
Thlamuanna mak tak a chhar ta hmangaihtu aw a hria,
Min hriatchhuah tir fo thin min pui turin a hnai reng.

I manganna hria i lungngaihna zawng nen,
Lal Isua ngei pawh khan in tahna ruam a zawh a sin;
A hmangaihna mak tak chu ringhlel suh ang che,
A thutiamah a dingnghet i manganna a hria.

Thlemna hmang in Dialbola'n a lo sawm thin che,
Bum in awm lul suh thihna kawng a ni e;
Fiahna tawk in Lal Isua thlalerah a awm,
Thlemna tawk thin mahse Isua a nghing love.

I rah chin apiang i ram

I rah chin apiang i ram

Phuah: Rev Rohmingliana (L)
Satu: One in Christ

Thu ka pe che a ni lawm ni,
Chak tak leh huai takin awm rawh;
Hlau suh la, zam hek suh,
I rah chin apiang i ram.

Hlau suh la, awm hle hle mai rawh,
Lal Isuan i tan chhandam na;
A buatsaih chu thlir in,
Lalpa ah chuan chawl zawk rawh.

Hlau suh la, puang zel rawh,
Zam suh la, pen zel rawh;
Zak suh la, au chhuak rawh,
I rah chin apiang i ram a ni zel ang.

Aw, nang varparh zing lam fapa,
Lei ti khur a ram ti nghing tu;
Krista Isuaah chuan,
Hneh in i awm ta si a.

Hlau tur a chhandam kan ni lo,
Zam tur a koh kan ni hek lo;
Kraws hnehna thutak chu,
Puang tur a koh kan ni zawk.

Ka Pa Lalram

Ka Pa Lalram

Lettu: H Lalhlimpuia
Satu: One in Christ

Ka Pa lalramah hian,
Aw, thilsiam tinreng te;
Hlimin an zai rimawi zawng nen,
Fakna ten min hual e.

Ka Pa lalramah hian,
Zingtian parmawi tin te;
Sirva zaithiam tinreng te nen,
Siamtu fakin an awi e.

Ka Pa lalramah hian,
Muangten ka thla a chawl;
Vansang tui thuk khawmual zawng hi,
A kutchhuak an lo ni si.

Ka Pa lalramah hian,
Hei hi hriat reng ka duh;
Sual ral te chu lo lian mahse,
Aman ro a rel e.

Ka Pa lalramah hian,
Engahnge ka lungngaih;
Van ten an puang a lalna ropui,
Leilung lawm in zai rawh se.

Ka Pa lalramah hian,
A mawinate an eng;
Lentu chhawl thawm an min hmangaihna,
Khawi hmunah pawh min hlan e.


Ni thar

Ni thar

Lettu: Alvin Lalruatfela
Satu: One in Christ

Ni tin hian in a thar thin,
Nieng lo chhuak in nithar a hril;
An mawina zawng zawng ka tan a lo ni,
Ni tin hian in a thar thin;
Ka kiangah a awm engtik lai pawh in,
Ka tan chuan engkim hi a thar leh thin.

Zing a nieng lo chhuak chu,
Nidang angin a la mawi ngei e;
Sirva ten an fakhla mawi an rem,
Hnim hring a daifim lo bet leh;
Thing tin zara parmawi te chu,
Siamtun ka tan a lo duan vek;
A lo ni heng zawng zawng hi.

A kutchhuak ka ngaihtuah in,
Tlan tin ten a ropui zia an tarlang thin;
Thiam tak a siam tuifinriat zawng te,
Hringmi tan a nunna pe in;
A thu in zan niah a chang,
Heng zawng zawng hi Lalpan min pek a ni.

                                                                                                             

18 Aug 2017

Ka tawnmang mawl

Ka tawnmang mawl

Phuahtu: Dr.C Thanchamliana
Satu: Lalropuii Pachuau

Senhri iangin a lo vul e,
Puan ang kan nun alo thar leh e;
Thaikawi bawngte ka lo tir leh,
Aw, kei ka tan an sawi paradise.

Aw, a thar chuang lo, 
A thar chuang lo kan nun;
Kei ariang thinlai tina mai tur,
Aw, ka tawnmang mawl mai, 
Aw, ka tawnmang mawl mai.

Chhawrthlapui eng kal ruai hnuaiah,
Par ang kan vul tlangrel dawn lovin;
Zantlai khuarei lo chang pawh in,
Aw, sam ang then zai ka rel thei lo.

Hallo ten a riang ka tahna,
Nau ang a bei biahthu di min hlan;
Duh ten buan ang ka lo pawm leh,
Aw, kei ka tan an sawi paradise.

13 Aug 2017

Ka hawikir lo'ng

Ka hawikir lo'ng

Phuahtu: H Thanchianga
Satu: Vanlalzami, BCM Chanmari Pastor Bial Zaipawl

Lei hreawmna tuam velah ka awm laiin,
Hmangaihtu kohna aw ka hria a;
A hnen lam pana ka kal laiin,
Aw, khawvelah au kir leh rawh min ti.

Min hmangaihtu chu ka zui zel dawn si,
Khawvel in min lo au thin mahse;
Ka tlan zel dawn kraws lamtluangah,
Ka hawi kir lawng, ka kir leh tawh lo'ng.

Khawvel thianten hnuchhawn in min thlahthlam se,
Khawvel in hrethiam rih lo mahse;
Kei chuan e Lal rawng ka bawl zel dawn,
Aw, lei hreawmah ka kir leh tawh lo'ng.

Ka hmatiangah kraws par rimtui a leng vel,
A parmawi hnamtin tan damna chu;
Ka vuanta ka thlah leh phal tawh lawng,
Aw, ka lawm em em ka kir leh tawh lo'ng.

Anchhedawng hnu Lalber fa ka lo ni ta,
Thu leh hla a hril sen rual a ni lo;
A makin a ropui e hmangaihna,
Ka lungawi em ka kir leh tawh lo'ng.

Hla taka khawdur

Hla taka khawdur

Letlingtu: Kawlkhuma

Hla taka khawdur leh,
Ruahpui sur Piah lamah sawn;
Chatuan eng ropui tak a lang e,
A va nuam dawn em aw.

Chutah lungngaih, nat leh, 
Inthen a awm tawh lo vang;
Chu lui kamah kan in tawk khawm ang,
Kan chatuan inah khian.

Sawta tui fawn nasa tak piah saw,
Han thlir teh u;
Hmangaihna khawpui mawi tak,
Chanchin ropui zia min hrilh e.

Sawta luipui saw,
Unau duhten an kai ta e;
Lalpa ramah kan tak khawm leh ang,
Inthen a awm tawh lo'ng.

Aw, malsawm leh lawmna,
A in hawng, aw, ni ropui;
Chutah lungngaih leh mittui zawng zawng,
Isuan a hru fai ang.
Angelte lenna ramah

Angelte lenna ramah

Letlingtu: L Biakliana
Satu: Deborah & Chhantei, Malsawmtluangi Pachuau

Lungngaihni a awm thin,
Mangan lai a awm thin;
Ka lawm zel ang min lo au se,
Angelte lenna ramah

Angelte lenna ramah,
Hla tak a ram nuamah;
Hun lawmawmah kan chawl tawh ang,
Angelte lenna ramah.

Lalpa ka tha a ni,
Min hruaitu arsi nen;
Lawm takin min thlenpui ang a,
Angelte lenna ramah.

Hla taka ram nuamah,
Ka in ropui a awm;
Lallukhum hlu ka tan a awm,
Angelte lenna ramah.

Aw khawngaihtu Pathianin

Aw khawngaihtu Pathianin

Phuahtu: Chawngkhupa
Satu: Bawngkawn Pastor Bial Zaipawl

Aw, khawngaihtu Pathianin,
Kan thinlung chhungah hian;
Thlarau min pek lawmna hi,
Khawvel fin in a zo love.

Mihring mihrinna hian in,
A ngaituah chhuak zo lo a che,
Ka chhandamtu i thuruk hi.

A thukin a va sang em,
Khawvel fin zawng aiin;
Pathian hmangaihna thu hi,
Van leh khawvel an a khat e.

Aw, kei misual bo hnu hi,
A khawngaihna zarah;
Thlarau min pek nunna hi,
Aw ka nunna, Lalpa fak rawh.

Han thlir teh u romei zam karah

Han thlir teh u romei zam karah

Phuahtu: Saihnuna
Satu: Lalruotmawi

Han thlir teh u romei zam karah khian,
An lenna Zion tlangah khian;
Tual an leng e lungrual takin,
An ngai love chulhnu he lei ram hi.

Nghilhni a awm dawn lo kan tap,
Lalpa i ram ngai in; 
An leng dial dial lungrual kimin,
An awi Lal nunnema.

Min ngai lovin an leng ramthiang hlimah,
Kir ang rello an kal zel e;
Lei hi hnuchhawn ram a lo ni,
Par lai tlaini an liam lung a leng e.

A hun lo thleng tur chu ka nghakhlel e,
Lawmna pialral min hruai kai ang;
Aw then lovin lungduh te nen,
Chatuan partlan in lalber kan awi ang.

Ka tan ni leh thla reng a eng tawh lo

Ka tan ni leh thla reng a eng tawh lo

Phuahtu: Taivela
Satu: Lalruotmawi

Ka tan ni leh thla reng a eng tawh lo,
Thim in min bawm e, aw ka chhandamtu;
I hmun ropui thlen hlan ka nghakhlel e.

Chhandamtu tak chu ka va ngai em ve aw,
I khawngaihna thahrui in min kai la;
Chhandam fate lenna hmun mawiah chuan.

Van kawtthlerah khian Beramno aw chuan,
"Ka fa, lo kal rawh, i sual rit tak nen;
Ka lo chhawk ang che" tiin min ko e.

I hmangaih zia leh i ropui zia chu,
Tunge sawi thei ang leimi te zawng chuan;
Vanmi mi te zawng pawh in an sawi thei lo.

I lungngaih aw mah a lei a nghin chuan,
I ropuina nen i lo kal hun chuan;
Lei leh van rengin an dawl zo lovang.

Chuti ang ni chu a lo la thleng ang,
I hmelma te zawng hlau in an khur ang;
En teh min tlantu kan la ti ang a.

He lei hi chatuan ram a tling lo

He lei hi chatuan ram a tling lo

Phuahtu: Patea
Satu: Lalruotmawi

He lei chatuan ram a tling lo,
Lungngai a tahna a ni maw Lalpa;
Lawmna ten mual an liam ta e,
Hlimna par an chuai.

Aw, ka han thlir vang chung sang khi,
Angel lenna ram ropuiah chuan;
Chhandamten chawlhna ralmuangah,
"Khawvel ral tawh mai se," an ti.

Aw, ka ngai partin vulna ram nuam,
Chul lo tur Lal nunnema siamah chuan;
Min hruai zel la, aw, min kai la,
Tah lai min hnem rawh.

Beramno ram Zion ka thlen chuan,
Lungduh ka thenna reng ka ngai lo ang;
Hmangaih khawpui, hnamtin, chhungtin,
Lawmna kimah chuan.

Thlafam ngaia tlaini len chu

Thlafam ngaia tlaini len chu

Phuahtu: Hrangchhingi
Satu: Lalruotmawi

Thlafam ngai a tlaini len chu thinlai a zing riai e,
Kir leh reng hian an mawi silo;
Hnutiang an chhawn khawvel ram hi,
An sul i hnu run chhung zau leh laitual zawng te;
Ka tah mittui an chang zo ta.

Aw, ngaiin ka tap dar ang lenlai kha,
Run chhung nau ang nuihna rial tui ang a dai e;
Chhungkim te a hlim lai ni zawng kha,
Ka tahna an chang zo ta e.

Min dawnpui ve ang maw chinlai lenrual lungduh te hian,
Ka parmawi kung vullai a tliak;
Piallei thuah riat hnuai a zal chu,
Tawn leh ni reng a awm dawn lo khawvelah hian;
Ka tap tlangrel ka dawn zo lo.

Lalpa siamthar khawpuiah chuan an leng e lungduh te,
Khawvel ram reng an ngai tawh lo;
Zion Lalpa ropui fakin,
Haleluiah tia au in zai an rem e;
Lawmna chullo chu an chang ta.
Ni tin ka hnenah awm reng ang che Lalpa

Ni tin ka hnenah awm reng ang che Lalpa

Phuahtu: CZ Huala
Satu: Lalruotmawi

Ni tin ka hnenah awm reng ang che, Lalpa,
Keipawh i kianga awm ka ning lo;
Ka ngaih ni hian chawlhna ram min thlir tir la,
Ka zai nang e lungngaihna chhum hnuaiah pawh.

Aw, lawmna luikam ka thlen hun chuan,
Lungngai taka ka then tak te kha;
Ka Lal hmel hliam hnu kha ka awih pui ang,
Tah chuan van pialral par a vul reng ang a.

A va chuai hma em kan lawm lai ni te chu,
Aw Kalvari, lo mawi leh ang che;
Awi leh nang e zaiin i par min thliah la,
Lawmin ram thianghlim lam ka hawi leh nang e.

Hmana kan lawmna pialral chan mah ila,
Kalvariah khua a var leh ta;
Zion ram nuam an hawng leh ta an ti e,
I tho vang kan zalenna kawl a eng e.

Tunah hian lungrualin han leng ve ila,
Lungngaih nia lenrual ka ngaih te;
Lawma Lal hmaa ka zai pui hun tur chu,
Thlir chang ni hian, aw, ka va ngai zual thin em.

12 Aug 2017

I tlai lua

I tlai lua

Phuahtu: F Lalramliana
Satu: Sena & Pektea

Hmangaih luat vang hian relthang dawn zo lo hian,
I tawnah ka thinlung chhung hmangaihna;
Kimten hrilh turin in run ka lo lawi a,
Lungnat beidawnna mai ti hian min lo chhang a.

Nang nen a e Maruat, tuahrem zai rel tur chuan,
Phengphehlep a khua a tlai lua a ni e;
Tiin ka tan i remlohna anka dengkhawng chu,
Min hlan ta si maw ka thinlai a na vawng vawng.

I pianpui thinlung hmangaihna rinawm chu,
Chan in beisei in aw ka rawn pan che;
Mahse, i thinlung ngaihtuahna ram chuan in,
Hmangaih a zawngtu che lam reng a hawi silo.

Ka duhber mai leh hmangaihber nang chuan in,
I zun ngai ka chan min dawnpui lo hian;
Ka thinlung hi e chhun angin mi hliam si a,
A riang hmangaihna a tlawm lua a ni e.

Thinlung hmangaihna beidawnna lamtluangpui,
Zawh mek tu kei hi tun nge min hnem ang a;
Tun nge min tuarpui thiam tawk ta ang le aw,
Hringmi hmangaihna ka tan i pam lua e.

Hun leh ni herzel hian i tawnah hmangaihna,
Herliam pui thuai se thinlai lungdam nan;
I tan a tlinglo hian thinlung tap chung zel in,
Ka tlah liam mai ang che lengdang tang bel turin.


10 Aug 2017

Aia upa te zahthiam

Aia upa te zahthiam

Phuahtu: Liandala
Satu: Bethsy Lalrinsangi

Aia upa te zahthiam in,
An thute awih in zawm fo rawh,
Pipute ro thil hlu a ni,
Aia upa te zahthiam rawh.

An hnial ngai lo aia ute,
In ngaitlawm in zawl dawh fo rawh;
An sual ngai lo aia ute,
I thang tha ang duap kai fo rawh.

Ruaitheh a chaw kil ho te hian,
Bar hmasatu anni ngai lo;
Upaber in a bar hma chuan,
Naupangin an bar khalh ngai lo.

Aia upa i biak dawn in,
Koh dan mawiin kam tha hmang la;
Ka pi, ka pu, ka u tiin
Ka nu, ka pa, ka ni emaw.

Khawilo nia vahchhuah te hian,
Tar leh upa te awl tum rawh;
Tanpui ngai awm a an awm chuan,
Tlawm ngai lang in tangpui zel rawh.

Pianpui u zawk te an zah ngai,
Chun leh zua dawl saisen tet a;
U zawk in naute an dawm ngai,
Chu chu vanhnuai hringmi leng dan.

Luang zel ang che kan ramah hian,
Rangkachak aiin i hlu zawk;
Cham reng ang che kan thinlungah,
Thang thar nun dan zel ti mawi rawh.

7 Aug 2017

Vuina tur reng hi a lo awm lo ve

Vuina tur reng hi a lo awm lo ve

Phuahtu: R Vanlalzauva
Satu: C Lalhmingmawii, K Lalhmingliani

Ka hmalam hun turte ka han thlir chang ni hian,
Manganna, hreawm tur ka ngaihtuah a;
Kal ngaihna hrelo vin, aw, ka lo buai ve em em a,
I remruat ka tan a lo tawk reng si.

Vanduaina a awm tawh lo,
Mangan, lusunna, thihnate lo thlengah pawh;
I remruata innghat ringtute nun zawngah hian,
Vuina tur reng hi a lo awm lo ve.

Khawvel min an neih loh lungawina ka nei e,
Nitina ka nunna kal zelah hian;
Ka tan a tha tur a engkima min thawh sak hi,
Hria in, aw, ka buaina zawng ka pe e.

Rethei leh hausa zawng pawh angkhata kan lenna,
Kalvari hnehna Krista avangin;
Vanduai bik reng kan awm lo Lalpa remruatnaah,
Hlim takin kan leng, kan leng, kan leng a ni.


6 Aug 2017

Ka nu ka ngai a ni

Ka nu ka ngai a ni

Satu: Helen Zaithankungi Sailo, TBC Zaithanpuia

Riang hlei fahrah tur hian maw,
Khuanun min duang bik em ni;
Aw, zaleng hei zawng zingah hian,
Kei ang rairah awm ve maw?

Aw, ka chun famchang hnu,
Tapin ka zawng zel dawn;
Tawn leh ni her tak ang maw,
Ka nu ka ngai a ni.

Hmanah kha chuan chhungkim tein,
Nau ang kan nui za thin a;
Aw, ka chunnu, i tel lo chuan,
I hrai ang ar ang kan vai thin.

Ka zuam lul lo kumtluang a,
Chunnu ka dawm lo tur hi;
Aw, ka then leh rual zawng te hian,
Eng tin min dawn pui ve maw?



Hunte an kiam zel a

Hunte an kiam zel a

Phuahtu: Puna
Satu: Gospel Melodious Choir

Hunte an kiam zel a lei hlimna a ral thin,
Khawvelah lawmna a kim thei silo;
Lalpa lo leng la aw ni ropui rawn thlen la,
Rethei faten an lei hreawm kalsan an duh.

Aw, Edenthar nuamah chuan min hruai tawh la,
Lungngai taka inthen te kha lengza ila;
Kan lawm a kim ang a kan fak zel ang che,
Khawvel hi kan ngai lo nange i ramah chuan.

I tana tuartu ten chu ram chu an beisei,
Lei lawmna an tan a vul ve silo;
Zion mipui te leh hmangaihna Lal hmel chu,
Ni ropui a lo lang tur chu an thlir ning lo.

Lei lungngaih leh hreawm buaina tinreng hnuaiah,
Ringtute chu lawmin an zai zel thin;
An tan khua lo var se Salem thar nuamah chuan,
I hruaikhawm nun niropui ngaiin an thlir thin.

4 Aug 2017

A va nuam dawn em

A va nuam dawn em

Phuahtu: Buonglienkung
Satu: Monica Lalhlimpuii, Blessed Choir, ICI Central Choir, Bawngkawn Pavalai Pawl, 

Nghakhlel takin aw ka thlir ka chatuan hmun tur,
Engtiknge chu hmun mawi chu ka han thlen ve ang;
He khawvel ka zinna ram ka chhuahsan hun chuan,
Hlim taka Lalpa fak in ka la leng dawn si.

Aw, a va nuam dawn em (chu hmun mawi chu ka  thlen chuan)
(Hmangaihin ka) Lalpan (chuan) min lo pawm ang a (tah chuan hlim in ka leng ang);
He khawvel (ka zinna ram) hi ngai (tawh) lo vin, 
(Hlim takin) Van hmangaihna par tlan in ka la leng dawn si.

He khawvela sum leh pai, ro thil ka thlir chuan,
Hlimna reng a awm thei lo ka chan tawk hi chu;
Van hmuna rochan turte ka han chhui kir chuan,
Hlimna tawp lo chu changin ka la leng dawn si.

Ropui taka Lal Isua a lo kal hun chuan,
Ringlote hlau a khur in an la awm ang a;
Chu hunah ringtute nunna chu siam thar in,
Mu ang a thla a thlawk in an la leng dawn si.

Sang tam takin min lo thlir chatuan hmun mawiah,
Chu hmunah ka thlen hun chuan hlimin kan leng ang;
Thian duhawm chu hmun thleng turin i inpeih em,
Nitin in Lalpan a ko che hmangaih aw in.