Monday, 23 October 2017

Chibai kan buk che u

Phuahtu: Ananda
Thluk siamtu: Kima Chhangte
Satu: Green Mizoram Network

Kan nghah Krismas ni lo thlen hian thinlung lairila'n duhsakna,
Chhim leh hmar, chhak, thlang a leng zofa zawng te;
Kan hlan che u khuanu malsawmna tin leh,
Krisma leh kumthar hlim ten lo hmang turin

Green, Green Mizoram ten duhsakna kan hlan a che u
Green, Green Mizoram Krismas leh Kumthar chibai kan buk a che u.

Thenkhat chuan kawplai di rialin an leng mahna laitual hlim ten,
Nang erawh mahriak ten lo hmang thin mahla;
I lung lai rila'n kan tan a nau lo piang hi,
Lo lal zawk se khawvel hlim hlawp nun thlang lovin.

Kan nghah hunpui lo her chang hian,
Hmangaih lungduh mualliam hnute ngaih a thar leh in;
Fam zun phur a har ngei ang, mahse, mittui nen Krismas thlah bik lo la,
Chutin khuanun thlamuan in awmpui che u rawh se.

He hunpui a lo herchhuah hian lanu leng chhuihthang val zawng leh,
Rawlthar tuaitir leng zawng ten lo ngai ve ru;
I chun leh zua chinlai zawng te lung ti phang tu,
Chan tun lovin malsawmna thlen zawk ang che.

Awi, awi, awi, awi ka kil dawn e, ka kil dawn e,
Kei ka Lal piancham chu lawm turin;
Mas ruaipui chu leng i hian chheih ka kil nang e,
Vanlal naupian cham ka lawm nang e;
Lawm nang e, maw, thiani lawm nang e, ka lawm nang e.

Chhungkim lova Krismas

Phuahtu: C Latanpuia
Satu: Zobawm

Krismas ni lawmawm a her chhuak leh ta,
A mi leng ten hlimin hmang mahse;
Kei ni tan zawng fam ngai a awmkhawhar,
Suihlung ti leng ti zual tu a chang ta.

Chhung kim lova Krismas kan hmang ta hi,
Dawn lungruk reng aw a hlim thei lo;
Hlim leh lawm a miten an hman laiin,
Awm khawhar in maw kan hman tak le.

Fam dai rial chang in mual an liam zo ta,
Ka pi leh pu, ka chun leh zua te;
Ka unau, tu leh fa rualduh te,
Sakhmel tawn tur reng an awm ta lo.

Chhung kim te a lal pian champha Krismas,
Kan hman ho lai kha aw ka ngai thin;
Awm khawhar a kan rumna zawng zawng hi,
Lalpa chauh lo chuan min hnem zo lo.

Zoram kil tin a leng lenrual te u,
Hlim takin Krismas hmang ang che u;
Thinlaiah min han hrereng ula,
Keini fam ngai a rum zawng te hi.


A mian riang maw

Phuahtu: Rokunga

A mia'n riang maw, van mi a lo piang,
Bethlehem bawng in tlam a nghak e;
Amah chu mihring leh Pathian a ni,
Lal leh chhandamtu nih a fawm.

Hlim takin amah i fak ang u,
Min chhandam turin a ingaitlawm;
Ropui rawh se, aw, ropui ber rawh se,
Pathian kan hnena lo thleng hi.

A lalna thuruk miten an hriat loh,
Chatuana Pa angchhunga mi chu;
Mi fingte leh a lalna arsi nen,
Van mipui ten an rawn puang ta.

Hlimin i au vang, Lal thar a piang ta,
Thinlungin amah chu i bia ang;
Edom rimtu leh rangkachak ai chuan,
Thinlunga tawngtai a hlu zawk.

(Hlathu lakna: Kristian Hla Bu - No.114)

Ngai teh van lalfa chu

Phuahtu: Rokunga

Ngai teh, van lal fa chu, Behthlehem bawng in tlawmah,
Hringmi hraichawiin a lo piang a;
A lal ropuina van thutthleng chu rawn pelin,
Min tlan turin bawng in tlawmah a lo piang a.

Kan lawm a che, lei leh van Lal ropui,
Theihtawpin i fak hla kan sa ang;
Riangvaite leh retheite Lalpa,
Hmanah Bethlehem-ah i tan hmun a awm lo,
Tunah erawh i tan hmun a awm kan zingah.

A pianna hmun rethei - Bethlehem bawng in lo chu,
A tan hmun dang a awm ve si lo;
A lu a nghat a, Bethlehem bawng in tlawmah,
Lei lalte leh ama miten an duh silo.

Lal chungnung, hmun chungnung bera cheng hnu Lal Isua,
Lei lalten amah do mah sela;
Kei ta tan erawh Lal duhawm ber a ni si,
Riangvai kan lawmna tur renga Lal lo piang hi.

Hmanah Eden huana nunna kraun hlu kan hloh kha,
Tunah Lalpan min chhar sak leh ta;
A tawngkam chhuak hmangaihna, riangvai min hnemtu,
Varparharsi aia eng mawi Lal duhsawm hi.

Hmanah chuan Bethlehem-ah i tan hmun a awm lo,
Nang mi thianghlim van Lal pianan tur;
Tunah erawh hetah i tan hmun a awm e,
Isu, kan hnenah lo cheng la, min awmpui rawh.

(Hlathu lakna: Kristian Hla Bu - No.127)


Thimin lei a tuam laiin

Phuahtu: Rokunga

Thimin lei a tuam laiin,
Van engin piallei a chhun;
Vanho zai mawi a lo ri,
"Rem leng se," tiin an zai.

"Chungnung berah Pathian chu,
Ropui takin awm rawh se;
Lei chunga mihring hnenah,
Rem leng se," tiin an zai.

Puan eng var ropui sinin,
Bethlehem dai phullengah,
Chhandamtu lo pianga chu,
Chawimawi nan hla thar an sa.

Van mite an her liama,
Thangvan sang an kai hnu chuan,
Beramputen khawharin,
Bethlehem dai reh an nghak.

Keini pawh van mite u,
Berampute ang khanin,
'Leiah rem leng se,' tiin,
Min zaipui ve dawn lo'm ni?

(Hlathu lakna: Kristian Hla Bu - No.106)

Ringtu zawng zawngte u

Phuahtu: Mercer
Lettu: Rev. F.W Savidge

Ringtu zawng zawngte u,
Hlimin leh lawm takin;
Bethlehem khaw lamah chuan lo haw rawh u;
Amah en turin, vantirhkohte Lal Hi,
Amah i lo fak ang u, Krista kan Lal.

Vantirhkohte u,
Ring takin sa rawhu;
Vana mi zawng zawngte khian lo hriat turin;
Fakin awm rawh se, Pathian kan Lalber hi,
Amah i lo fak ang u, Krista kan Lal.

Lalpa, ka fak a che,
Kan dam nana piang hi;
Aw Lal Isu, i hming zahawm fo rawh se;
Kan tuar ai i tuar, Pathian fa i ni si!
Amah i lo fak ang u, Krista kan Lal.

(Hlathu lakna: Kristian Hla Bu - No.81)

Aw van leng rual, zai thiamte u

Lettu: Hrawva
Satu: Lalrindiki Khiangte, Liandingpuii, Liandingpuii, H Lalmuankimi

Aw, van leng rual, zai thiamte u,
Chhandamtu pianna hla;
'Leiah rem leng rawh se' tiin,
In la zai fo lo'm ni?
Hmanah zai hla rem mawi,
Suria leng in awihna;
Lairilah a cham reng,
Aw, van aw mawite u.

Aw nang, enna mawi leh duhawm,
Van ropuina puangtu;
Ram loh tui thiang cham del chungah,
Berampu tuannaah,
Zan thianghlim ber ang khan,
Beisei lawm leh ringin,
Min awmpui reng ang che,
Aw, eng mawi leh duhawm.

Hmangaiha min tlantu hnenah,
Hruaitu chungleng siar;
van zawl kawlkung khi zawng ila,
Kan la tawng leh ang che'm?
Kawlrawn zawng i liam lo,
I eng a chuai chuang lo;
Kan tan lo eng ve rawh,
Hruaitu siar ropui.

(Hlathu lakna: Kristian Hla Bu - No.80)