Sunday, 7 July 2013

Mangtha mai le lei hringnun

Phuahtu: Lalhmunsiama
Satu: Lalbiakzauva, Janet Lalmuansangi

Aw ka hringnun Kalvari ah,
I nihna chu a lang e;
Ka nunna Krista Isua hi,
I tan thihna a lo ni.

Thi i lo ni, aw, ka hringnun,
Aw ka nun Krista ah hian;
Ka nun Krista ka han en hian,
Thi i lo ni ka hringnun.

Aw ka hringnun i remruat hi,
Ka Lal remruat a ni lo;
Duh thuhmun thei reng kan nilo,
Ka nun Krista i thihna.

I nihna hmun Lalpa ruat ah,
Aw ka hringnun chawl tawh rawh;
Kei pawh Lalpa hmun ruat ah chuan,
Ka chawl chhandamtu hnen ah.

Aw ka hringnun hnuai lama chhuak,
Kei chunglam chhuak ka ni e;
Lal hnih rawng hi ka bawl thei lo,
Ka hringnun min chawlh san rawh.

I chhuahna hmun khawhar pan rawh,
Ka hawng tang e Lal hnenah;
Ka chhuahna vankhawpui pan in,
Mangtha mai le lei hringnun.


3 comments:

  1. Lalbiakzauva (Zuapa a rui e tih satu) pawh khan a album-ah a sa a sin, ka pc-ah pawh ka nei e.

    He hla phuah tu Pu Lalhmunsiama hi Mizo Kristian hla phuah thiam Patea tupa kha ani e.

    ReplyDelete
  2. @Lalrinzova Khawlhring Lalhnam, i rawn sawi ang hian Pu Lalbiakzauva hming pawh kan tarlang tel tawh e, kan lawm hle mai.

    ReplyDelete
  3. A lawmawm hle mai! He hla hi chu satu an awm nual mai! ZODINTHARI VANTAWNG ICON pawh khan 'music video' siamin a sa bawk a ni.
    Blog ka lo lut khat hle mai, ka hman apiangin lo luh ka tum ve thin ang e.

    ReplyDelete